Самарқандда транспорт соҳасига бағишланган "Миллий саноат занжири" кўргазмаси ўтказилади

Жорий йилнинг 15–16 июль кунлари Самарқанд вилояти Жомбой туманидаги "Sof Expo" кўргазма марказида транспорт соҳасига бағишланган "Миллий саноат занжири" кўргазмаси бўлиб ўтади.

 

Кўргазма Саноат кооперацияси ва давлат харидлари агентлиги, Транспорт вазирлиги ҳамда транспорт соҳасидаги йирик давлат буюртмачилари ва тармоқ корхоналари ҳамкорлигида ташкил этилмоқда.

 

"Миллий саноат занжири" кўргазмалари йирик давлат ва корпоратив буюртмачиларнинг эҳтиёжлари асосида маҳаллий ишлаб чиқаришни ривожлантириш, саноат кооперациясини кенгайтириш ҳамда янги ишлаб чиқариш лойиҳаларини шакллантиришга хизмат қилувчи доимий платформа ҳисобланади.

 

Мазкур платформанинг амалий натижалари жорий йил май ойида Оҳангаронда ўтказилган Тоғ-конь ва металлургия соҳасига бағишланган илк кўргазмада ҳам ўз аксини топди. Якунига кўра 2,7 триллион сўмлик қўшимча келишув ва шартномаларга эришилди, қарийб 1 миллиард долларлик маҳсулотларни маҳаллийлаштириш бўйича истиқболли лойиҳалар шакллантирилди.

 

Навбатдаги кўргазмада транспорт соҳасидаги йирик давлат буюртмачиларининг амалдаги ва истиқболдаги харид эҳтиёжлари тақдим этилади. Маҳаллий ишлаб чиқарувчилар эса ўз маҳсулотлари, бутловчи қисмлари, технологик ечимлари ҳамда импорт ўрнини босувчи ишланмаларини намойиш этиш имконига эга бўлади.

 

Тадбир доирасида давлат харидлари, маҳаллийлаштириш, саноат кооперацияси, логистика ва инвестициялар йўналишларида амалий учрашувлар, шунингдек, B2B ва B2G форматидаги мулоқотлар ҳам ташкил этилиши режалаштирилган.

 

Кўргазмада иштирок этиш учун рўйхатдан ўтиш бошланган. Тадбир 15–16 июль кунлари Самарқанд вилояти Жомбой туманидаги "Sof Expo" кўргазма марказида бўлиб ўтади.