Тошкентда трансмиллий киберфирибгарлик билан шуғулланган гуруҳ қўлга олинди

 

Республика бўйлаб ўтказилаётган “Хавфсиз ва соғлом юрт” кенг қамровли тезкор-профилактик тадбирлари доирасида Ички ишлар вазирлиги Кибержиноятларга қарши курашиш департаменти ҳамда Давлат хавфсизлик хизмати томонидан трансмиллий киберфирибгарлик билан шуғулланган йирик жиноий тармоқ фаолиятига чек қўйилди. Бу ҳақда Ички ишлар вазирлиги маълум қилди.

 

Дастлабки маълумотларга кўра, жиноий гуруҳ аъзолари Канада, Буюк Британия, Германия, Норвегия, Нидерландия, Дания ва бошқа давлатлар фуқароларини юқори даромадли инвестиция ҳамда криптоактив лойиҳалари баҳонасида алдаб, уларнинг маблағларини ноқонуний ўзлаштириш билан шуғулланиб келган.

 

Аниқланишича, ушбу фаолиятга чет тилларини мукаммал биладиган ёшлар, жумладан, олий таълим муассасалари талабалари ҳам жалб этилган. Улар сохта телефон рақамлари орқали хориж фуқароларига мунтазам қўнғироқлар қилиб, ўзларини трейдер ёки инвестиция маслаҳатчиси сифатида таништириб, фишинг ҳаволалар ёрдамида фуқароларни криптоактивларга сармоя киритишга ундаган.

 

Тезкор тадбирлар давомида Тошкент шаҳрида фаолият юритган иккита йирик салл-марказ фош этилган.

 

Яшнобод туманидаги бизнес марказларидан бирининг олтинчи қаватида жойлашган кол-марказда 97 нафар шахс аниқланган бўлиб, улардан 5 нафари чет эл фуқаролари экани маълум бўлган.

 

Шунингдек, Яккасарой туманидаги бизнес марказининг 11-қаватида жойлашган яна бир салл-марказда 34 нафар шахс фаолият олиб боргани, уларнинг 3 нафари хориж фуқаролари экани аниқланган.

 

Тергов маълумотларига кўра, жиноий гуруҳ қатъий конспирация қоидалари асосида фаолият юритган. Ходимлар махсус ўқитилган, хорижлик фуқаролар билан тахаллуслар орқали мулоқот қилган. Биноларга кириш қатъий назорат остида бўлиб, махсус қўриқлаш тизими йўлга қўйилган.

 

Тезкор тадбирлар давомида кол-марказларда жиноий фаолиятда фойдаланилган:

• 136 та компьютер;

• 90 та монитор;

• 73 та процессор;

• 53 та моноблок;

• 320 та телефон аппарати;

• 128 та қаттиқ диск;

• 175 та хотира қурилмаси;

• 2 та сейф ҳамда бошқа техник воситалар ашёвий далил сифатида расмийлаштириб олинган.

 

Мазкур ҳолат юзасидан Ички ишлар вазирлиги Кибержиноятларга қарши курашиш департаменти Тергов бошқармаси томонидан жиноят иши қўзғатилиб, дастлабки тергов ҳаракатлари давом эттирилмоқда.