Тошкентдаги ЙТҲ: иккига бўлиниб кетган Lacetti'да икки киши ҳалок бўлди

 

Тошкент шаҳрининг Юнусобод туманида содир бўлган оғир йўл-транспорт ҳодисаси оқибатида икки киши ҳалок бўлди, яна уч нафар фуқаро, жумладан, икки нафар вояга етмаган бола оғир тан жароҳатлари билан шифохонага ётқизилди.

 

Пойтахт Ички ишлар бош бошқармаси маълум қилишича, ҳодиса 30 июнь куни соат 05:10 атрофида Амир Темур ва Боғишамол кўчалари чорраҳасида юз берган. Дастлабки маълумотларга кўра, қайрилаётган Lacetti автомобили юқори тезликда ҳаракатланган Kia K5 билан тўқнашган. Кучли зарба оқибатида Lacetti автомобили иккига бўлиниб кетган.

 

Аниқланишича, Kia K5 автомобилини вояга етмаган шахс бошқарган. У терговга берган кўрсатмасида отасининг автомобилини рухсатсиз олиб чиққани, дўстлари билан машина ҳайдаш мақсадида йўлга чиққани ҳамда юқори тезлик сабаб чорраҳада автомобилни тўхтата олмаганини билдирган. У содир бўлган фожиадан чуқур афсусдалигини айтиб, ҳалок бўлганларнинг яқинлари ва ота-онасидан узр сўраган.

 

Вояга етмаган ҳайдовчининг отаси ўғлининг автомобилни унинг рухсатисиз олиб чиққанини маълум қилиб, содир этилган қилмиш учун қонун доирасида қандай жазо белгиланса, шунга тайёр эканини билдирган.

 

Мазкур ҳодиса юзасидан жамоатчилик муҳокамаси ҳам ўтказилиб, унда маҳалла фаоллари, вояга етмаганларнинг ота-оналари, улар таҳсил олаётган мактабнинг педагоглари ва ўқувчилари иштирок этган.

 

Ҳолат юзасидан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан жиноят иши қўзғатилган. Ҳодисага ҳуқуқий баҳо бериш мақсадида тергов ҳаракатлари давом эттирилмоқда.