Венесуэладаги зилзила қурбонлари сони 3685 кишига етди
Табиий офат оқибатида 190 та бино бутунлай вайрон бўлган, 856 таси жиддий шикастланган.
Венесуэлада содир бўлган кучли зилзила оқибатида ҳалок бўлганлар сони 3685 кишига етди. Бу ҳақда мамлакат Миллий Ассамблеяси президенти Хорхе Родригес маълум қилди.
Ҳукуматнинг навбатдаги расмий ҳисоботига кўра, табиий офат оқибатида 16 740 киши жароҳатланган, 17 907 нафар фуқаро бошпанасиз қолган. Шунингдек, 190 та бино тўлиқ вайрон бўлган, яна 856 та бино жиддий зарар кўрган.
Маълум қилинишича, қидирув-қутқарув ишлари давомида 6462 нафар фуқаро қутқарилган, 25 970 киши тиббий муассасаларда даволанган. Жабрланган аҳолига ёрдам кўрсатиш доирасида 86 794 оилага кўмак етказилган, шунингдек, 9603 тонна озиқ-овқат маҳсулоти тарқатилган.
Эслатиб ўтамиз, 24 июнь куни Венесуэлада қарийб 40 сония оралиғида магнитудаси 7,2 ва 7,5 бўлган иккита кучли зилзила содир бўлган эди. Уларнинг эпицентри Яракуй штати ҳудудида, бир-биридан тахминан 10 километр узоқликда жойлашган.
