АҚШда ўзбекистонлик ҳайдовчи иштирокидаги ЙТҲ оқибатида 21 ёшли йигит ҳалок бўлди
ЙТҲда ўзбекистонлик бошқарувидаги юк машинаси енгил автомобиль билан тўқнашган. Ҳайдовчи далилларни яширишга уринганликда айбланмоқда.
АҚШнинг Огаё штатида ўзбекистонлик ҳайдовчи иштирокида содир бўлган йўл-транспорт ҳодисаси оқибатида 21 ёшли йигит ҳалок бўлди. Бу ҳақфа New York Post нашри хабар берди.
Ҳодиса 5 июль куни Огаё штатининг Медисон округидаги И-71 автомагистралида юз берган. Дастлабки маълумотларга кўра, 42 ёшли Ўзбекистон фуқароси Беҳзод Асраров бошқарувидаги Freightliner русумли юк машинаси Honda Accord автомобили билан тўқнашган. Оқибатда енгил автомобиль ҳайдовчиси, 21 ёшли Тобиас Форсайт воқеа жойида вафот этган.
Маълум қилинишича, Беҳзод Асраров 2024 йилда диверсификацион виза (Green Card) дастури орқали АҚШга борган. У юк автомобилини бошқариш учун зарур ҳайдовчилик гувоҳномасига эга бўлган. Бироқ инглиз тилини етарли даражада билмагани сабабли ҳодиса жойида патруль хизмати ходимлари у билан Google Translate орқали мулоқот қилган.
Тергов материалларига кўра, патруль ходимлари юк машинаси кабинасини кўздан кечириш чоғида видеорегистратор қурилмаси ўрнатилганини, аммо камеранинг ўзи жойида йўқлигини аниқлаган. Саволларга жавоб бериш жараёнида Асраров камерани ўнг чўнтагига солиб қўйганини кўрсатган.
Шу муносабат билан унга ҳозирча ашёвий далилларни яшириш ёки йўқ қилишга уриниш моддаси бўйича айблов эълон қилинган. Унинг ёнидан учта мобил телефон ҳамда электрон юк ташиш планшети ҳам топилган. Айни пайтда ҳодиса юзасидан тергов ҳаракатлари давом этмоқда ва кейинчалик қўшимча айбловлар қўйилиши мумкинлиги истисно қилинмаган.
Ҳалок бўлган Тобиас Форсайт АҚШдаги Массачусетс университети дарвозабони бўлгани қайд этилган.
Мазкур ҳодисага муносабат билдирган АҚШ транспорт вазири Шон Даффи инглиз тилини етарли даражада билмайдиган ҳайдовчиларнинг оғир юк транспортларини бошқариши хавфсизлик нуқтайи назаридан жиддий муаммо эканини таъкидлаган.
Унинг сўзларига кўра, йўл белгиларини ўқий олмайдиган ёки ҳуқуқни муҳофаза қилувчи органлар ходимлари билан мулоқот қила олмайдиган шахсларга оғир юк автомобилларини бошқаришга рухсат берилмаслиги керак. Вазир бундай ҳолатларнинг олдини олиш ва хавфли ҳайдовчиларни йўллардан четлатиш бўйича зарур чоралар кўрилишини маълум қилган.
