Эрдўған НАТО етакчиларига револьвер совға қилди

Туркия Президенти Ражаб Тойиб Эрдўған Анқарада бўлиб ўтган НАТО саммити якунида давлат ва ҳукумат раҳбарларига ноодатий совға — исм-шарифи ўйиб ёзилган револьвер ва жонли ўқ-дориларни топширди. Бу ҳақда Reuters агентлиги хабар берди.

 

Қайд этилишича, совға Туркиянинг мудофаа саноати салоҳиятини намойиш этиш мақсадида тақдим этилган. Етакчиларга 1990 йилларда Туркиянинг МКЕ компанияси ишлаб чиқарган камёб Гумусай .357 Magnum револьвери ёғоч қутида топширилган. Қутига Туркия байроғи ва НАТО логотипи туширилган бўлиб, унда турк ва инглиз тилларида “Gumusay — мамлакатимизда ишлаб чиқарилган илк револьвер туридаги тўппонча” деган ёзув ҳам мавжуд.

 

Испания Бош вазири Педро Санчес матбуот котибига кўра, барча делегация раҳбарларига бир хил моделдаги револьвер берилган ва уларнинг ҳар бирига эгасининг исми ўйиб ёзилган.

 

Совға айрим давлатлар учун логистика ва божхона билан боғлиқ муаммоларни ҳам юзага келтирган. Белгия Бош вазири Барт Де Вевер револьверни Брюссел аэропорти полициясига топширган бўлса, Полша Президенти Карол Навротскийга берилган қурол Варшава аэропортида божхона расмийлаштирувидан ўтишни кутмоқда.

 

Нидерландия ва Швеция бош вазирлари идоралари револьверлар Анқарадаги элчихоналарга олиб кетилганини маълум қилган. Нидерландияга берилган қурол фойдаланишга яроқсиз ҳолга келтирилиши режалаштирилган, Швецияники эса импорт ҳужжатлари расмийлаштирилишини кутмоқда.

 

Reuters манбасига кўра, Буюк Британия Бош вазири Кир Стармерга револьвер билан бирга қуролни тозалаш тўплами ва 500 дона ўқ ҳам берилган. Италия Бош вазири Жоржа Мелонининг совғаси эса Римдаги ҳукумат қароргоҳида сақланмоқда. Европа комиссияси президенти Урсула фон дер Ляен ўзига берилган револьверни ҳарбий музейга топширишни режалаштирмоқда.

 

Женевадаги Small Arms Survey маълумотига кўра, Туркия 2019–2024 йилларда енгил қурол экспорти бўйича АҚШ ва Италиядан кейин дунёда учинчи ўринни эгаллаган. Мамлакат ушбу даврда қарийб 3 миллиард долларлик енгил қурол экспорт қилган.