Қайси йўналишга неча балл керак? Ўқишни кўчириш мезонлари маълум бўлди

 

2026/2027-ўқув йили учун хорижий ҳамда нодавлат олий таълим муассасаларидан Ўзбекистон давлат олий таълим ташкилотларига ўқишни кўчириш бўйича минимал ўтиш баллари тасдиқланди.

 

Олий таълим, фан ва инновациялар вазирининг тегишли буйруғига мувофиқ, ўқишни кўчириш мақсадида ўтказиладиган махсус синовлар учун минимал ўтиш баллари таълим йўналишлари кесимида 60 баллдан 165 баллгача этиб белгиланди.

 

Тасдиқланган мезонларга кўра, энг юқори ўтиш бали ҳуқуқ йўналиши учун — 165 балл, энг паст кўрсаткич эса ветеринария йўналиши учун — 60 балл этиб белгиланган.

 

Йўналишлар бўйича минимал ўтиш баллари қуйидагича:

• Ҳуқуқ — 165 балл;

• Сиёсатшунослик, халқаро муносабатлар, жаҳон иқтисодиёти ва халқаро иқтисодий муносабатлар — 140 балл;

• Соғлиқни сақлаш — 132 балл;

• Санъат, ижтимоий фанлар, журналистика, бизнес ва бошқарув — 105 балл;

• Транспорт хизматлари — 104 балл;

• Таълим, гуманитар фанлар, тиллар, атроф-муҳит, математика ва статистика, ахборот-коммуникация технологиялари ҳамда ижтимоий таъминот — 94 балл;

• Биологик фанлар, физика ва хизмат кўрсатиш — 80 балл;

• Муҳандислик, ишлаб чиқариш ва архитектура — 75 балл;

• Қишлоқ, ўрмон ва балиқ хўжалиги ҳамда меҳнат муҳофазаси — 70 балл;

• Ветеринария — 60 балл.

 

Вазирликнинг эслатишича, хорижий олий таълим муассасаларидан Ўзбекистон давлат олий таълим ташкилотларининг мос ёки турдош бўлмаган бакалавриат таълим йўналишларига ўқишни кўчиришга рухсат берилмайди.