Тошкент метросида поездлар ҳаракатида узилиш кузатилди
“Пахтакор” бекатида одам ҳаддан ташқари кўпайиб кетганидан ҳаво исиб, йўловчилардан айримларининг мазаси қочган.
9 июль куни соат 20:02 атрофида Чилонзор йўналишида "Халқлар дўстлиги" ва "Пахтакор" метро бекатлари оралиғида ҳаракатланаётган эски турдаги поездда техник носозлик аниқланди. Бу ҳақда “Тошкент метрополитени” ДУК хабар берди.
Маълум қилинишича, хавфсизликни таъминлаш мақсадида йўловчилар поезддан туширилган, носоз таркиб эса бошқа поезд ёрдамида техник кўрик йўлагига олиб кетилган. Шу сабабли Чилонзор йўналишида поездлар ҳаракати тахминан 8 дақиқага тўхтаб қолган.
“Ҳозирги вақтда метрополитеннинг барча йўналишларида поездлар белгиланган ҳаракат жадвали асосида қатновни давом эттирмоқда. Йўловчиларимиздан юзага келган вақтинчалик ноқулайлик учун узр сўраймиз”, дейилади хабарда.
Воқеа жойида бўлган Zamon.uz мухбирига кўра, техник узилиш кузатилгач, “Пахтакор” бекатида одам ҳаддан ташқари кўпайиб кетганидан ҳаво исиб, йўловчилардан айримларининг мазаси қочган.
