Зангиотада фуқаро МИБга қаршилик қилиб, бинога ўт қўйди

Ижтимоий тармоқларда Тошкент вилоятининг Зангиота туманида ноқонуний қуриб олинган тикувчилик цехи МИБ ходимлари томонидан бузилиб, унинг ичида бўлган буюмлар ёқиб юборилгани айтилган видеолар тарқалиб, муҳокамаларга сабаб бўлмоқда.

 

Мажбурий ижро бюросининг Zamon.uz'га маълум қилишича, Фуқаролик ишлари бўйича Зангиота туманлараро судининг ижро варақасига асосан қарздор Т.Шукурова томонидан Зангиота тумани “Эшонгузар” кўрғонидан ўтувчи автомобиль йўлининг муҳофаза минтақасида қурилган 100,1 кв.метрдан иборат ноқонуний қурилмани ўзининг ҳисобидан бузиш тўғрисидаги ижро ҳужжати бўлим иш юритувига келиб тушган.

 

Ижро ҳаракатлари давомида юқорида кўрсатилган ноқонуний қурилмани ихтиёрий муддатда бузиш учун қарздор Т.Шукурова бир неча маротаба огоҳлантирилганига қарамасдан ноқонуний қурилмани бузишдан бўйин товлаб келган.

 

Шундан сўнг, жорий йилнинг 20 июль куни қарздор Т.Шукуровага ноқонуний қурилмани бўшатиш ва ўз ҳисобидан бузиб олиш, акс ҳолда мажбурий тартибда бузилиши ҳақида такроран огоҳлантирилган. Бироқ, қарздор Т.Шукурова огоҳлантирилганидан кейин орадан 17 кун ўтган бўлса-да, қарор ижросини бажаришдан бўйин товлаб келган.

 

8 июль куни давлат ижрочилари томонидан ноқонуний қурилмани бузиш ижро ҳужжати ижросини таъминлаш мақсадида манзилга боришганида, ноқонуний қурилмани бўшатишдан бўйин товлаб, ижро ҳаракатларига қаршилик кўрсатган.

 

Бундан ташқари, қарздор Т.Шукурованинг синглиси ижро ҳаракатларини тўхтатиш мақсадида, ноқонуний қурилмада кўрпаларни ёқиш йўли билан ёнғин ҳолатини содир этган ва бу ҳолат фавқулодда вазиятлар тезкор ходимлари томонидан дарҳол бартараф этилган.

 

Ижро ҳаракатлари давомида қарздор Т.Шукурова ва унинг яқин қариндошларига шикаст етказилмаган ва ноқонуний қурилма эса бузилиб, ижро ҳужжати ижроси таъминланган.