АҚШ Адлия вазирлиги Эпштейн иши бўйича терговга тўсқинлик қилишда айбланмоқда

 

АҚШнинг Нью-Мексико штати бош прокурори Раул Торрез АҚШ Адлия вазирлигини Жеффри Эпштейннинг собиқ Зорро Ранч қароргоҳи бўйича олиб борилаётган терговга тўсқинлик қилаётганликда айблади. Бу ҳақда СNN хабар берди.

 

Маълум қилинишича, штат прокуратураси бир неча ой аввал федерал ҳукуматдан Зорро Ранч билан боғлиқ тергов материалларини, жумладан, жабрланувчилар, гувоҳлар ва эҳтимолий шерикларга оид таҳрир қилинмаган ҳужжатларни тақдим этишни сўраган. Бироқ, Раул Торрезнинг таъкидлашича, орадан қарийб 130 кун ўтганига қарамай, ушбу материаллар ҳали ҳам тўлиқ тақдим этилмаган.

 

Бош прокурорнинг фикрича, федерал ҳужжатларсиз штат даражасидаги терговни тўлиқ ва самарали олиб бориш деярли имконсиз. У айнан шу материаллар орқали янги жабрланувчилар, воқеаларнинг тўлиқ тафсилотлари ҳамда эҳтимолий шерикларнинг шахсини аниқлаш мумкинлигини қайд этган.

 

АҚШ Адлия вазирлиги эса ушбу айбловларни рад этган. Вазирлик вакили СNN'га берган изоҳида Нью-Мексико прокуратурасининг мурожаатига июнь ойида жавоб берилганини ва федерал ҳукумат штат терговини қўллаб-қувватлашга тайёрлигини билдирган. Шунингдек, тергов давомида федерал жиноят аломатлари аниқланса, улар бўйича алоҳида суриштирув ўтказилиши ва зарур ҳолларда айблов эълон қилиниши мумкинлиги таъкидланган.

 

Шунга қарамай, Раул Торрез вазирликнинг жавобини етарли эмас деб баҳолаган. Унинг таъкидлашича, талаб қилинган асосий ҳужжатлар ҳануз тақдим этилмагани терговнинг чўзилишига сабаб бўлмоқда.

 

Эслатиб ўтамиз, Нью-Мексико ҳукумати жорий йил бошида Санта-Фе яқинидаги Зорро Ранч қароргоҳи бўйича мустақил терговни қайта бошлаган эди. Қурбонларнинг кўрсатмаларига кўра, Жеффри Эпштейн ушбу ранчда йиллар давомида вояга етмаган қизларни жинсий эксплуатация қилган бўлиши мумкин.

 

Мазкур иш юзасидан штат парламенти махсус “Эпштейн ҳақиқат комиссияси”ни ташкил этган бўлиб, комиссия бир қатор федерал идоралардан ҳужжатлар ва маълумотларни тақдим этишни талаб қилмоқда.

 

Раул Торрез вақт ўтиши билан тергов мураккаблашиб бораётганини, айрим далиллар йўқолган бўлиши мумкинлигини ва Зорро Ранч аллақачон бошқа эгага сотилганини қайд этган. Шунга қарамай, у штат прокуратураси ишни охиригача тергов қилиш ниятида эканини билдирган.

Маълумот учун, Жеффри Эпштейн 2019 йилда вояга етмаганларни жинсий эксплуатация қилиш ва одам савдоси билан боғлиқ айбловлар юзасидан суд жараёни бошланишидан аввал Ню-Ёркдаги қамоқхонада вафот этган.