Дилнозахон Каттахонова Бош вазир ўринбосари этиб тайинланди
Мазкур лавозимда фаолият юритиб келган Зулайҳо Маҳкамова эгаллаб турган вазифасидан озод этилди.
Дилнозахон Каттахонова Ўзбекистон Республикаси Бош вазирининг ўринбосари – Оила ва хотин-қизлар қўмитаси раиси этиб тайинланди.
Бу ҳақдаги қарор Олий Мажлис Қонунчилик палатасининг ялпи мажлисида депутатлар томонидан маъқулланди деб хабар берди Zamon.uz манбаси.
Шу муносабат билан мазкур лавозимда фаолият юритиб келган Зулайҳо Маҳкамова эгаллаб турган вазифасидан озод этилди.
Тайинловга қадар Дилнозахон Каттахонова Ёшлар ишлари агентлиги директорининг биринчи ўринбосари лавозимида фаолият юритган.
Маълумот учун, Дилнозахон Каттахонова 1991 йил 2 июлда Фарғона вилоятининг Қўқон шаҳрида туғилган. У 2014 йилда Мирзо Улуғбек номидаги Ўзбекистон Миллий университетининг бакалавриат босқичини тамомлаган.
Меҳнат фаолияти давомида 2016–2017 йилларда Ўзбекистон Хотин-қизлар қўмитасининг Халқаро алоқаларни ривожлантириш ва нодавлат нотижорат ташкилотларини қўллаб-қувватлаш бўлимида бош мутахассис лавозимида ишлаган.
