Ислом цивилизацияси форуми якунланди: иштирокчилар Президентга мурожаат йўллади

 

Тошкент шаҳрида Ислом цивилизацияси бўйича I халқаро форумнинг тантанали ёпилиш маросими бўлиб ўтди. Бир неча кун давомида Тошкент, Самарқанд ва Термиз шаҳарларида ташкил этилган нуфузли халқаро анжуман якунида форум иштирокчиларининг Ўзбекистон Президенти Шавкат Мирзиёев номига мурожаати ўқиб эшиттирилди.

 

Якунловчи ялпи йиғилишни Ўзбекистондаги Ислом цивилизацияси маркази директори Фирдавс Абдухолиқов очиб берди. У форум қисқа вақт ичида ислом цивилизацияси тарихи, илмий мероси ва замонавий тараққиётига бағишланган энг йирик халқаро мулоқот майдонларидан бирига айланганини таъкидлади ҳамда барча иштирокчиларга фаол иштироки ва илмий ҳиссаси учун миннатдорлик билдирди.

 

Қайд этилишича, форумда дунёнинг 46 давлатидан 500 нафардан ортиқ олим, тадқиқотчи, давлат ва жамоат арбоби, халқаро ташкилотлар ҳамда илмий муассасалар вакиллари қатнашди.

 

Форум доирасида Тошкент шаҳрида 14 та ялпи ва 6 та шўба йиғилиши, Самарқандда 3 та халқаро илмий конференция ва 11 та ялпи йиғилиш, Термизда эса 1 та халқаро конференция ҳамда 2 та шўба йиғилиши ташкил этилди. Учала шаҳардаги илмий анжуманларда жами 129 та маъруза тингланди.

 

Шунингдек, форум давомида Ислом цивилизациясига бағишланган қатор илмий ва нашриёт лойиҳалари тақдим этилди. Якунда Форум декларацияси қабул қилиниб, 2027–2031 йилларга мўлжалланган халқаро ҳамкорлик йўл харитаси тасдиқланди. Бешта китоб тақдимоти ўтказилди, олтита англашув меморандуми ва ҳамкорлик шартномаси имзоланди.

 

Форум иштирокчиларининг Президент Шавкат Мирзиёев номига йўллаган мурожаатида мазкур халқаро анжуман инсониятнинг умумий маънавий ва интеллектуал меросини асрашга хизмат қилувчи глобал ҳамкорликнинг янги босқичи сифатида баҳоланди.

 

Мурожаатда Президент ташаббуси билан ташкил этилган Ўзбекистондаги Ислом цивилизацияси маркази сўнгги ўн йилликдаги энг муҳим халқаро гуманитар ташаббуслардан бири экани алоҳида эътироф этилди. Шунингдек, марказ келгусида дунёнинг етакчи олимлари, университетлари, музейлари ва илмий муассасаларини бирлаштирувчи йирик халқаро илмий-маърифий платформага айланишига ишонч билдирилди.

 

Форум иштирокчилари Ўзбекистонда тарихий меросни асраш, илм-фанни ривожлантириш ва цивилизациялараро мулоқотни мустаҳкамлаш борасида амалга оширилаётган ислоҳотларни юқори баҳолаб, Ислом цивилизациясини ўрганиш, асраш ва тарғиб қилиш бўйича Бутунжаҳон альянсини ташкил этиш ташаббусини илгари сурдилар.

 

Якунда Президентимиз Шавкат Мирзиёевга, Ўзбекистон ҳукумати, форум ташкилотчилари ва Ўзбекистон халқига форумни юксак савияда ташкил этгани ҳамда самимий меҳмондўстлик учун миннатдорлик билдирилди.