Испаниядаги ўрмон ёнғинида 12 киши ҳалок бўлди
Ҳалок бўлганларнинг аксарияти автомобилларда қочишга уринган пайтда олов қуршовида қолган.
Испаниянинг жануби-шарқидаги Андалусия автоном ҳудудида юз берган йирик ўрмон ёнғини оқибатида камида 12 киши ҳалок бўлди. Ҳодиса мамлакат ва Жанубий Европанинг бошқа ҳудудларида давом этаётган кучли жазирама фонида содир бўлди. Бу ҳақда BBС хабар берди.
Ёнғин Лос Галярдос шаҳарчаси яқинида бошланган. Дастлабки маълумотларга кўра, электр узатиш тармоғидаги носозлик оқибатида қулаган сим қуруқ ўсимликларни ёндириб юборган. Кучли шамол ва ҳаво ҳароратининг 40 даражага яқинлашгани сабаб олов қисқа вақт ичида катта ҳудудга тарқалган.
Маҳаллий ҳукумат маълумотига кўра, ҳалок бўлганларнинг аксарияти автомобилларда қочишга уринган пайтда олов қуршовида қолган. Яна бир неча киши куйиш ва тутундан заҳарланиш аломатлари билан шифохонага ётқизилган. Ўнлаб аҳоли хавфсиз ҳудудларга эвакуация қилиниб, вақтинчалик бошпаналарга жойлаштирилган.
Ёнғинни ўчириш ишларига юзлаб ўт ўчирувчилар, вертолётлар ва махсус авиация жалб этилган. Бироқ юқори ҳарорат, кучли шамол ҳамда қуруқ об-ҳаво оловни назорат остига олишни қийинлаштирмоқда. Айрим автомобиль йўллари ёпилган, аҳолига зарурат бўлмаса уйларини тарк этмаслик тавсия этилган.
Испания бош вазири Педро Санчес ҳалок бўлганларнинг оила аъзоларига ҳамдардлик билдириб, ҳукумат жабрланганларга зарур ёрдам кўрсатилишини маълум қилди. Андалусия ҳукумати ҳам ёнғин оқибатларини бартараф этиш учун барча зарур куч ва воситалар сафарбар этилганини билдирди.
Айни пайтда Жанубий Европанинг бошқа мамлакатлари ҳам жазирама ва йирик ёнғинларга дуч келмоқда. Франция, Португалия ва Грецияда ҳам ўнлаб ўрмон ёнғинлари қайд этилган. Метеорологлар ҳаво ҳароратининг яқин кунларда ҳам юқори бўлиши ва ёнғин хавфи сақланиб қолишидан огоҳлантирмоқда.
