Маданият вазирлиги ва Кинематография агентлиги раҳбариятида ўзгаришлар бўлди
Маданият вазирининг тўрт нафар ўринбосари лавозимидан озод этилиб, янгилари тайинланди. Ҳасан Салиҳов Президентнинг маданият бўйича вакили бўлди.
Ўзбекистон президенти қарорлари билан Маданият вазирлиги ҳамда вазирлик ҳузуридаги Кинематография агентлиги раҳбариятида қатор лавозим тайинловлари ва ўзгаришлар амалга оширилди. Бу ҳақда Президент матбуот котиби Шерзод Асадов маълум қилди.
Унга кўра, Нодирбек Сайфуллаев маданият вазирининг биринчи ўринбосари этиб тайинланди. Одилжон Абдуқаҳоров эса маданият вазири ўринбосари лавозимини эгаллади.
Жаҳонгир Ахмедов маданият вазирининг биринчи ўринбосари — Маданият вазирлиги ҳузуридаги Кинематография агентлиги директори этиб тайинланди. У ушбу лавозимда Шухратулла Ризаевнинг ўрнини эгаллади. Ахмедов 2025 йил май ойидан буён Болалар контентини ривожлантириш марказига раҳбарлик қилиб келаётган эди.
Шунингдек, Санжар Бобожонов маданият вазири ўринбосари этиб тайинланди. Шу муносабат билан у президентнинг маданият бўйича вакили бўлинмаси бош инспектори лавозимидан озод этилди.
Бошқа ишга ўтиши муносабати билан Баходир Ахмедов ва Авазхон Тажиханов маданият вазирининг биринчи ўринбосари, Муроджон Мажидов ҳамда Юсуфжон Усмонов эса маданият вазири ўринбосари лавозимидан озод қилинди.
Бундан ташқари, Ҳасан Салиҳов президентнинг маданият бўйича вакили этиб тайинланди. У мазкур тайинловга қадар Креатив индустрия парки директори лавозимида фаолият юритган.
