Путин кузда янги сафарбарлик эълон қилиши мумкин

Россия президенти Владимир Путин жорий йил кузида мамлакатда янги ҳарбий сафарбарлик эълон қилиши мумкин. Бундай тахминни Чехия президенти, истеъфодаги генерал Петр Павел билдирди. Унинг фикрича, Россия сентябрь ойидаги парламент сайловларидан кейин Украинадаги урушни янада кучайтиришга уриниши эҳтимоли юқори.

 
Павелнинг айтишича, Путин сайловлардан олдин оммавий сафарбарлик эълон қилишдан тийилиши мумкин, чунки бу қарор ички сиёсий норозиликни кучайтириш хавфини туғдиради.

 
"Россияда сентябрь ойида парламент сайловлари бўлиб ўтади. Путин сайловларгача сафарбарлик эълон қилиши эҳтимолдан йироқ. Аммо сайловлардан кейин вазият ўзгариши мумкин", деган у.

 
Чехия президенти Украина ва унинг иттифоқчиларида вазиятни дипломатик йўл билан ҳал қилиш учун чекланган вақт қолганини таъкидлаган.

 
"Биз Россияга музокараларни бошлашга тайёр эканимиз ҳақида аниқ сигнал беришда давом этишимиз керак. Аммо бунинг учун босимни ҳам сақлаб қолиш зарур", деган Павел.

 
Сўнгги ҳафталарда Украина Россиянинг нефть саноатига қарши узоқ масофали дрон ҳужумларини сезиларли даражада кучайтирди. Реутерсънинг Кремлга яқин манбаларга таяниб ёзишича, айнан ушбу зарбалар Путинни урушни тўхтатишдан кўра, аксинча, ҳарбий ҳаракатларни кучайтиришга ундамоқда. Манбаларга кўра, Кремль раҳбари ҳозирча сулҳ бўйича таклифларни қабул қилиш ниятида эмас.

 
Таҳлилчиларнинг айтишича, Украина ҳужумлари Россиянинг йирик нефтни қайта ишлаш заводлари ва ёқилғи омборларига жиддий зарар етказган. Натижада мамлакатнинг нефтни қайта ишлаш қуввати сезиларли даражада камайган, айрим ҳудудларда эса бензин ва дизель тақчиллиги кузатилмоқда. Бу Россиянинг урушни молиялаштириш имкониятларига ҳам босим ўтказмоқда.

 
Reuters суҳбатлашган Кремлга яқин уч манбанинг айтишича, Путин урушни давом эттириш тарафдори бўлиб қолмоқда. У Донетск ва Луганск вилоятларининг тўлиқ назоратини қўлга киритишни асосий мақсад деб билмоқда ҳамда АҚШ президенти Доналд Трамп илгари сураётган тинчлик ташаббусларини ҳозирча қабул қилиш ниятида эмас. Манбалардан бири яқин ойларда ҳарбий ҳаракатлар янада кучайиши эҳтимоли "жуда юқори" эканини билдирган.

 
Айни пайтда Россия ҳукумати янги умумий сафарбарлик эълон қилиши бўйича расмий баёнот бергани йўқ. Кремль ҳам Петр Павелнинг бу ҳақдаги фикрларига изоҳ бермаган. Шу сабабли ҳозирча бу маълумотлар расмий қарор эмас, балки экспертлар ва сиёсатчилар билдираётган эҳтимолий сценарий сифатида баҳоланмоқда.