Саида Мирзиёева Дилнозахон Каттахановани янги лавозими билан табриклади
Хотин-қизлар бандлигини таъминлаш, зўравонликнинг олдини олиш ва оғир ҳаётий вазиятдаги аёлларни қўллаб-қувватлаш устувор вазифалар бўлиши кераклиги таъкидланди.
Президент администрацияси раҳбари Саида Мирзиёева Дилнозахон Каттаханованинг Ўзбекистон Бош вазирининг хотин-қизлар масалалари бўйича ўринбосари лавозимига тайинлангани муносабати билан уни табриклади.
Мирзиёева ўзининг ижтимоий тармоқдаги саҳифасида ушбу лавозим 19 миллиондан ортиқ хотин-қизларнинг манфаат ва эҳтиёжлари билан боғлиқ катта масъулият эканини таъкидлади.
Унинг қайд этишича, хотин-қизлар бандлигини таъминлаш, хориждаги ҳамюртларни қўллаб-қувватлаш ҳамда зўравонликнинг олдини олиш каби масалалар вақтинчалик чоралар билан эмас, балки пухта ишлаб чиқилган тизимли ёндашув асосида ҳал этилиши лозим.
Шунингдек, Саида Мирзиёева жазо муддатини ўтаётган, уйидан ва фарзандларидан узоқда меҳнат қилаётган ҳамда оғир ҳаётий вазиятга тушиб қолган хотин-қизларга алоҳида эътибор қаратиш зарурлигини таъкидлади.
“Оғир ҳаётий вазиятга тушиб қолган аёллар: жазо муддатини ўтаётган, уйи ва фарзандларидан узоқда меҳнат қилаётган хотин-қизларга алоҳида эътибор қаратилиши лозим. Улар ёлғизланиб қолмаганларини, давлат уларнинг қисматига бефарқ эмаслигини ҳис қилишлари керак”, дея ёзди Президент администрацияси раҳбари.
Якунда Мирзиёева Дилнозахон Каттахановага янги фаолиятида оқилалик, қатъият ва юртдаги ҳар бир аёл ҳаётида ижобий ўзгаришлар акс этадиган юксак натижалар тилади.
