Тошкентда халқаро университетлар шаҳарчаси ташкил этилади
Шаҳарчада нуфузли хорижий олий таълим муассасалари филиалларини очиш, замонавий кампуслар ва талабалар турар жойларини барпо этиш режалаштирилган.
Президент Шавкат Мирзиёевга таълим тизимини халқаро стандартлар асосида ривожлантиришга оид таклифлар тақдимоти давомида Тошкент халқаро университетлар шаҳарчасини ташкил этиш ташаббуси муҳокама қилинди.
Лойиҳани амалга оширишда Қатардаги Education City, Бирлашган Араб Амирликларидаги Dubai International Academic City ҳамда Жанубий Кореядаги Incheon Global Campus тажрибасидан фойдаланиш таклиф этилди.
Таклифларга кўра, университетлар шаҳарчасида нуфузли хорижий олий таълим муассасалари филиалларини очиш, замонавий кампуслар ва талабалар турар жойларини барпо этиш режалаштирилган.
Шунингдек, лицензиялаш талабларини соддалаштириш, грант ва стипендиялар ажратиш, божхона ҳамда солиқ имтиёзларини қўллаш, роялти тўловларининг бир қисмини қоплаш механизмларини ишлаб чиқиш кўзда тутилмоқда.
Таъкидланишича, ташаббуснинг асосий мақсади Ўзбекистонни халқаро таълим дастурлари ва стандартлари кенг жорий этилган, минтақадаги етакчи таълим марказига айлантиришдан иборат.
Тақдимот якунида Президент Шавкат Мирзиёев таклифларни маъқуллаб, интеграциялашган таълим дастурларини босқичма-босқич кенгайтириш, уларнинг сифатини халқаро талабларга мослаштириш ҳамда нуфузли хорижий университетлар билан узоқ муддатли академик ҳамкорликни йўлга қўйиш бўйича мутасаддиларга топшириқлар берди.
