Ўзбекистонда 2030 йилгача камида 5 та олийгоҳ дунёнинг энг яхши 500 та университети қаторига киритилади
100 та олийгоҳ таълим дастурини халқаро аккредитациядан ўтказиш ҳамда камида 150 та техникумда халқаро таълим дастурларини жорий этиш режалаштирилган.
Президент Шавкат Мирзиёев халқаро таълим стандартлари асосида ўрта махсус, касбий ва олий таълим дастурларини жорий этиш ҳамда нуфузли хорижий университетлар билан академик ҳамкорликни кенгайтиришга оид таклифлар тақдимоти билан танишди.
Тақдимотда қайд этилишича, сўнгги саккиз йилда олий таълим тизимида амалга оширилган ислоҳотлар натижасида олий таълим билан қамров даражаси 9 фоиздан 44 фоизга, талабалар сони эса 270 минг нафардан 1,7 миллион нафарга етган.
Жорий йилда 643 та техникумнинг 100 тасида Германия, Буюк Британия, Швейсария, Хитой ва Жанубий Кореянинг илғор касбий таълим дастурлари жорий этилмоқда.
Шунингдек, “Тошкент ирригация ва қишлоқ хўжалигини механизациялаш муҳандислари институти” миллий тадқиқот университети ҳамда Ўзбекистон Миллий университети халқаро рейтингларда дунёнинг энг яхши мингта олий таълим муассасаси қаторидан жой олди. Олий таълим муассасаларидаги 157 та таълим дастури халқаро аккредитациядан ўтказилган.
Тақдимотда таълим сифатини ошириш, олийгоҳларнинг халқаро рақобатбардошлигини кучайтириш ва битирувчиларнинг глобал меҳнат бозоридаги имкониятларини кенгайтириш бўйича янги вазифалар белгиланди.
Хусусан, 2030 йилгача камида бешта олий таълим муассасасини умумий рейтингларда, яна ўнта олийгоҳни фан йўналишлари бўйича дунёнинг энг яхши 500 талик университетлари қаторига киритиш мақсад қилинган. Шунингдек, 100 та олийгоҳ таълим дастурини халқаро аккредитациядан ўтказиш ҳамда камида 150 та техникумда халқаро таълим дастурларини жорий этиш режалаштирилган.
Бундан ташқари, олий таълим муассасалари битирувчилари ва педагогларининг камида 30 фоизини хорижий тил ҳамда мутахассислик бўйича халқаро сертификатлар билан таъминлаш, 2,5 минг нафар техникум ва 20 минг нафар олийгоҳ педагогини хорижда малака оширишга юбориш вазифаси белгиланди.
