Ўзбекистонда 3 мингга яқин манфаатлар тўқнашуви ҳолати аниқланди
Давлат идораларида манфаатлар тўқнашувига оид 831 та қонунбузарлик ҳолати аниқланиб, юзлаб ходимларга нисбатан тартибга солиш чоралари кўрилди.
Коррупцияга қарши курашиш агентлиги давлат органлари ва ташкилотларида манфаатлар тўқнашувининг олдини олиш бўйича амалга оширилган ишларни комплекс таҳлил қилди. Натижада 2 951 та манфаатлар тўқнашуви ҳолати аниқлангани маълум бўлди.
Агентлик маълумотига кўра, давлат органлари ва ташкилотлари ходимлари томонидан 336 та мавжуд манфаатлар тўқнашуви тўғрисидаги хабарнома тақдим этилган. Шунингдек, эҳтимолий манфаатлар тўқнашувига оид 627 385 та декларация расмийлаштирилган.
Таҳлил натижасида 446 та мавжуд ҳамда 2 505 та эҳтимолий манфаатлар тўқнашуви аниқланиб, уларнинг умумий сони 2 951 тани ташкил этган.
Қонунчилик талабларига мувофиқ 865 та ҳолат юзасидан манфаатлар тўқнашувини бартараф этиш чоралари кўрилгтан. Жумладан:
-
138 нафар ходим бошқа раҳбар бўйсунувига ўтказилган;
-
11 нафар ходим коллегиал орган таркибидан чиққан;
-
21 нафар ходимнинг хизмат ваколатлари қайта кўриб чиқилган;
-
51 нафар ходимнинг айрим ахборот ва ҳужжатлардан фойдаланиши чекланган;
-
301 нафар ходимнинг якка тартибда қарор қабул қилиш ваколати устидан коллегиал назорат ўрнатилган;
-
87 нафар ходимга шахсий манфаатдорликни бартараф этиш бўйича тавсиялар берилган;
-
196 нафар ходим шахсий манфаатдорлигидан ихтиёрий воз кечган;
-
60 нафар ходим бошқа лавозимга ўтказилган ёки улар билан меҳнат шартномаси бекор қилинган.
Ўрганишлар давомида вазирликлар ҳамда маҳаллий ижро этувчи ҳокимият органларида манфаатлар тўқнашувининг олдини олиш бўйича белгиланган чекловларга риоя этилмаган 831 та ҳолат аниқлаган. Шундан 60 таси вазирликлар, 771 таси эса маҳаллий ҳокимликлар ҳиссасига тўғри келади.
Мазкур қонунбузарликлар юзасидан Маъмурий жавобгарлик тўғрисидаги кодекснинг 193-4-моддаси асосида 168 та маъмурий ҳуқуқбузарлик тўғрисидаги баённома расмийлаштирилиб, суд қарорларига мувофиқ айбдорларга нисбатан жарима жазоси қўлланилган.
Коррупцияга қарши курашиш агентлиги давлат органлари ва ташкилотларида манфаатлар тўқнашувининг олдини олиш ҳамда бу борадаги қонунчилик талабларига риоя этилиши устидан назоратни изчил давом эттиришини маълум қилди.
