Али Хоманаий ва бошқа қурбонлар учун қасос олинади — Можтабo Хоманаий
Эрон Олий Раҳбари қасос олиш халқ иродаси эканини билдириб, АҚШ ва Исроилни жавобгарликка тортишга ваъда берди.
Эрон Олий Раҳбари Мужтабo Хоманаий АҚШ ва Исроилнинг ҳужумлари оқибатида ҳалок бўлган собиқ Олий Раҳбар Али Хоманаий ҳамда бошқа эронликларнинг ўлими учун қасос олиниши ҳақида баёнот берди.
Фарс агентлиги хабарига кўра, Мужтабо Хоманаий Ислом инқилоби қўриқчилари корпуси (IRGC) томонидан эълон қилинган мурожаатида қасос олиш Эрон халқининг қатъий талаби эканини таъкидлаган.
“Биз сизнинг ва ушбу урушларда ҳалок бўлган барча шаҳидларнинг қони учун жиноятчиларни жазолашга қасамёд қиламиз. Бу қасос халқимизнинг иродасидир ва у албатта амалга ошади”, — дейилади баёнотда.
Унинг сўзларига кўра, бу жараён айрим шахсларнинг тақдирига боғлиқ эмас ва Эрон ўз мақсадидан воз кечмайди.
Мазкур баёнот Али Хоманаий дафн маросими муносабати билан тайёрланган нутқдан парча экани қайд этилган. IRGC маълумотига кўра, унда Эрон халқининг “шаҳидлар қони учун жавоб бериш” қатъияти яна бир бор таъкидланган.
Эслатиб ўтамиз, Эрон расмийлари маълумотига кўра, собиқ Олий Раҳбар Али Хоменеи 28 февраль куни АҚШ ва Исроил томонидан амалга оширилган ҳужумларда ҳалок бўлган. Шундан сўнг унинг ўғли Можтаба Хоманаий мамлакатнинг янги Олий Раҳбари этиб тайинланган. Али Хоманаий 9 июль куни Машҳад шаҳрида дафн этилган.
