Андижонда ЙПХ ходимини айблаб, видео жойлаштирган ҳайдовчи узр сўради
Ҳайдовчи давлат рақам белгисини яширгани учун жавобгарликка тортилганидан норози бўлиб, бу ҳақда ижтимоий тармоқда видео эълон қилган.
Андижон вилоятида автомобилининг давлат рақам белгисини қасддан яшириб ҳаракатланган ҳайдовчига нисбатан маъмурий чора кўрилди. Кейинчалик у ижтимоий тармоқларда тарқатган видеодаги айбловлари учун узр сўради.
Андижон вилояти Йўл ҳаракати хавфсизлиги бошқармаси ахборот хизматининг маълум қилишича, қулфланиб қолган эшикларни очиш хизмати билан шуғулланувчи фуқаро ўзига тегишли Матиз русумли автомобилнинг олд ва орқа давлат рақам белгиларини қора целлофан пакет билан ёпган ҳолда ҳаракатланган.
Қоидабузарлик ЙПХ ходими томонидан аниқланиб, ҳайдовчи тўхтатилган ва унга нисбатан белгиланган тартибда қонуний чоралар кўрилган.
Аниқланишича, мазкур фуқаро бундан 10 кун аввал ҳам айнан шу ЙПХ ходими томонидан давлат рақамини скотч билан ёпган ҳолда ҳаракатлангани учун тўхтатилган. Ўшанда унга тушунтириш ишлари олиб борилиб, огоҳлантириш билан чекланилган. Шунга қарамай, ҳайдовчи қоидабузарликни такрорлаган.
Ҳайдовчи дастлаб ушбу ҳолат юзасидан ижтимоий тармоқларда ЙПХ ходимларини айбловчи видеони эълон қилган. Бироқ кейинчалик ўз қоидабузарлигини тан олиб, ички ишлар органлари ходимлари томонидан кўрилган чоралар қонуний бўлганини билдирган ҳамда обуначиларидан узр сўраган.
Ҳолат юзасидан Маъмурий жавобгарлик тўғрисидаги кодекснинг 127-моддаси асосида маъмурий баённома расмийлаштирилган. Қоидабузарлик содир этилган транспорт воситаси вақтинча сақлаш учун жарима майдончасига жойлаштирилган.
