Қашқадарёда икки бор қўлга тушган эшак гўшти савдогари 4,5 йилга қамалди
Судланувчининг хонадонидан икки маротаба юзлаб килограмм истеъмолга яроқсиз гўшт ва эшак терилари аниқланган.
Қашқадарё вилоятида ўз хонадонида эшак сўйиб, гўштини сотиш билан шуғулланган эркакка 4,5 йил муддатга озодликдан маҳрум қилиш жазоси тайинланди.
Kun.uz маълумотларига кўра, 44 ёшли фуқаро И.Х. қисқа муддат ичида мазкур қилмиши учун икки маротаба судланган.
Дастлаб, 2025 йил 22 октябр куни ўтказилган тезкор тадбир давомида унинг яшаш хонадонидан 61 килограмм истеъмолга яроқсиз гўшт, 112 дона эшак териси ҳамда 15 дона эшак қовурғаси аниқланган. Ушбу ҳолат юзасидан Жиноят ишлари бўйича Касби туман суди томонидан унга 2 йил озодликни чеклаш жазоси тайинланган.
Шунга қарамай, 2025 йил 28 декабрь куни ўтказилган навбатдаги тезкор тадбирда унинг хонадонидан 247 килограмм истеъмолга яроқсиз гўшт, эшак суяклари ва 99 дона эшак териси топилган. Ушбу иш бўйича Қарши туман суди 2026 йил 13 майдаги ҳукми билан яна озодликни чеклаш жазоси тайинлаган.
Мазкур ҳукм юзасидан Қашқадарё вилояти прокурори биринчи ўринбосари томонидан протест киритилиб, тайинланган жазо ҳаддан ташқари енгил экани таъкидланган.
Натижада Қашқадарё вилоят суди жиноят ишлари бўйича судлов ҳайъати кассация инстанцияси дастлабки ҳукмни бекор қилиб, янги ҳукм чиқарди.
Суд қарорига кўра, И.Х. Жиноят кодексининг 186-моддаси 2-қисми «в» банди билан айбли деб топилиб, 4 йил озодликдан маҳрум қилиш жазосига ҳукм қилинди. Аввалги ҳукм билан тайинланган жазо қисман қўшилиб, унга якуний 4 йил 6 ой озодликдан маҳрум қилиш жазоси белгиланган.
Маҳкум жазони қаттиқ тартибли колонияда ўташи белгиланди ва у суд залининг ўзида қамоққа олинган.
