Хитойда “Бави” тўфони хавфи сабаб 600 мингдан ортиқ аҳоли эвакуация қилинди

Япониянинг Сакишима оролларига зарба берган ва Тайваннинг шимолий қисмини четлаб ўтган "Бави" тўфони Хитой томон ҳаракатланмоқда. Табиий офат хавфи туфайли мамлакатнинг шарқий ҳудудларидан 600 мингдан ортиқ аҳоли эвакуация қилинди. Бу ҳақда Al Jazeera хабар берди.

 

Хитой расмийлари маълумотига кўра, Чжесзян провинциясидан 500 мингдан ортиқ, қўшни Футсзян провинциясидан эса 100 мингга яқин киши хавфсиз ҳудудларга кўчирилди.

 

Синоптиклар прогнозига кўра, тайфун 13 июлга ўтар кечаси Чжесзян провинциясининг Венчжоу шаҳрига етиб бориши ва кучли ёмғир ҳамда шамол олиб келиши кутилмоқда. Метеорологларнинг таъкидлашича, "Бави" аввалги кучини анча йўқотган бўлса-да, таркибидаги катта миқдордаги намлик сабабли ҳамон жиддий хавф туғдирмоқда.

 

Хитой миллий метеорология хизмати тайфун бўйича иккинчи энг юқори — тўқ сариқ даражадаги огоҳлантиришни эълон қилди. Юзлаб авиарейслар бекор қилинди, темирйўл қатнови қисқартирилди, мактаблар ва паромлар фаолияти вақтинча тўхтатилди.

 

Футсзян провинциясининг Нинде шаҳрида 3,7 мингдан ортиқ аҳоли хавфли ҳудудлардан эвакуация қилинган, 17 мингдан зиёд қутқарувчи фавқулодда вазиятларга тайёр ҳолатга келтирилган.

 

Айни пайтда Хитой жанубидаги Хайнан ва Гуанси ҳудудлари ҳафта бошида кузатилган "Майсак" тропик бўрони оқибатларини бартараф этишда давом этмоқда. Наннин шаҳрида тўғон бузилиши оқибатида юзага келган тошқинларда камида 39 киши ҳалок бўлган.

 

"Бави" тайфуни қўшни давлатларда ҳам талафотлар келтириб чиқарди. Филиппинда кучли ёмғир ва кўчкилар оқибатида камида 17 киши ҳалок бўлди. Тайванда 36 киши жароҳат олди, 14 минг 210 киши эвакуация қилинди. Япониянинг Окинава префектурасида эса 200 дан ортиқ авиарейс бекор қилиниб, аҳоли кучли шамол, баланд тўлқин ва сув сатҳининг кўтарилиши хавфи ҳақида огоҳлантирилди.