Пентагон НУЖлар ҳақида янги ҳужжатларни эълон қилди

 
АҚШ Мудофаа вазирлиги номаълум учувчи жисмлар ҳақидаги махфийлаштирилган ҳужжатларнинг тўртинчи тўпламини жамоатчиликка тақдим этди. Навбатдаги релиз таркибига 40 та янги материал, жумладан 19 та видео, 14 та ҳужжат, 4 та аудиоёзув ва 3 та сурат киритилган. Бу ҳақда CBS News хабар берди.

 
Ҳужжатлар АҚШ ҳукумати томонидан май ойида ишга туширилган PURSUE дастури доирасида эълон қилинмоқда. Дастур Доналд Трампнинг давлат идораларига НУЖлар билан боғлиқ материалларни босқичма-босқич махфийликдан чиқариш ҳақидаги топшириғидан сўнг йўлга қўйилган.

 
Янги тўпламдаги энг эътиборли материаллардан бири 1949 йилда АҚШ Атом энергияси комиссияси томонидан Лос-Аламос ядровий маркази устида кузатилган сирли "яшил олов шарлар" ҳақидаги ҳисоботи бўлди. Ўша пайтда мутахассислар ҳодисага аниқ изоҳ топа олмаган ва у совет жосуслик фаолияти ёки номаълум табиий ҳодиса бўлиши мумкинлигини тахмин қилган.

 
Шунингдек, 1996 йилда Space Shuttle Columbia экипажи томонидан олинган суратлар ҳам эълон қилинди. Уларда Ер орбитасида пайдо бўлган номаълум ёруғ жисмлар акс этган. Пентагон ушбу объектларнинг келиб чиқиши ҳақида якуний хулоса бермаган.

 
Материаллар орасида АҚШ ҳарбий учувчисининг ҳисоботи ҳам бор. 28 йиллик тажрибага эга учувчи хизмат парвози вақтида кузатган объект ҳақида "Бу мен илгари кўрган нарсаларга ўхшамас эди" деган.

 
Ҳисоботга кўра, объект ғайриоддий тезликда ҳаракатланган, кескин йўналиш ўзгартирган ва мавжуд авиация технологияларига хос бўлмаган парвоз хусусиятларини намоён этган. Бироқ текширув якунида ҳодисага аниқ изоҳ берилмаган.

 
Яна бир видеода АҚШ Ҳинд-Тинч океани қўмондонлиги томонидан Сариқ денгиз узра кузатилган олти қиррали юлдуз шаклидаги номаълум объект тасвирланган. Ҳарбийлар уни бир муддат кузатган бўлсада, унинг табиати ва келиб чиқишини аниқлай олмаган.

 
Пентагон таъкидлашича, эълон қилинган ҳужжатлар ўзга сайёраликлар мавжудлигини тасдиқламайди. Аксарият ҳолатлар бўйича маълумотлар етарли бўлмагани ёки тасвир сифати пастлиги сабаб объектларнинг асл ҳолатини аниқлашнинг имкони бўлмаган. Шу билан бирга, идора бундай ҳодисаларни миллий хавфсизлик нуқтайи назаридан ўрганишда давом этишини билдирган.

 
CBS News'нинг қайд этишича, Пентагон май ойидан буён НУЖлар ҳақидаги материалларни босқичма-босқич эълон қилиб келмоқда. Дастлабки учта релиз ҳам жамоатчиликда катта қизиқиш уйғотган, бироқ уларда ҳам ўзга сайёраликлар ёки номаълум технологиялар мавжудлигини исботловчи далиллар топилмаган эди. Расмийларга кўра, келгусида ҳам янги ҳужжатлар ва видеолар эълон қилиниши режалаштирилган.