Тошкентда Tracker 6 ёшли болани босиб кетди
Бола олган оғир тан жароҳатлари сабаб воқеа жойида вафот этган.
Тошкент шаҳрининг Мирзо Улуғбек туманида Tracker русумли автомобиль иштирокида содир бўлган йўл-транспорт ҳодисаси оқибатида 6 ёшли бола ҳалок бўлди.
«Миллар»нинг маълум қилишича, ҳодиса жорий йилнинг 1 июль куни Чўлдарахт кўчасида юз берган. Ҳаракатланиб кетаётган Tracker русумли автомобиль йўлга тўсатдан югуриб чиққан 6 ёшли болани босиб кетган.
Кузатув камералари тасвирларига кўра, бола йўл четида тўхтаб турган Cobalt автомобили ортидан югуриб чиққан ва Tracker уни олд ҳамда орқа ғилдираклари билан босиб ўтган. Оқибатда бола олган оғир тан жароҳатлари сабаб воқеа жойида вафот этган.
Маҳаллий аҳоли мазкур ҳудудда болалар майдончаси йўқлиги сабабли болалар кўчада ўйнашга мажбур бўлаётганини билдирган. Айрим гувоҳларнинг таъкидлашича, автомобилни бошқарган ҳайдовчи аёл ҳодиса содир бўлган пайтда тормоз бермаган.
Мазкур ҳолат юзасидан Тошкент шаҳар ИИББ ҳузуридаги Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш, одам ўлимига сабаб бўлиши) билан жиноят иши қўзғатилган.
Ҳозирда ҳодиса юзасидан тергов ҳаракатлари давом эттирилмоқда.
