Ўзбекистон ва Қозоғистон трансчегаравий сувларни биргаликда бошқаради

 

Қозоғистон Президенти Қосим-Жомарт Тўқаев Ўзбекистон ва Қозоғистон ҳукуматлари ўртасида трансчегаравий сув объектларини биргаликда бошқариш ҳамда улардан оқилона фойдаланиш тўғрисидаги битимни ратификация қилиш ҳақидаги қонунни имзолади.

 

Мазкур битим 2025 йил 15 ноябрь куни Тошкент шаҳрида имзоланган бўлиб, у трансчегаравий сув ресурсларидан адолатли ва оқилона фойдаланиш, уларни биргаликда бошқариш ҳамда давлатлараро аҳамиятга эга сув хўжалиги объектларининг ишончли ва хавфсиз ишлашини таъминлашга қаратилган.

 

Битимга мувофиқ, Ўзбекистон ва Қозоғистон ўртасида трансчегаравий сув объектларини бошқариш бўйича ҳукуматлараро комиссия ташкил этилади. Мазкур комиссия умумий сув ресурсларидан фойдаланиш, давлатлараро гидротехника иншоотларини эксплуатация қилиш ҳамда уларнинг хавфсизлигини таъминлаш билан боғлиқ масалаларни мувофиқлаштириб боради.

 

Шунингдек, томонлар сув хўжалиги соҳасида ахборот алмашиш, сув ресурсларини бошқариш бўйича ҳамкорликни кучайтириш ва ўзаро манфаатли лойиҳаларни ривожлантиришга келишиб олган.

 

Мутахассислар фикрича, битим трансчегаравий сув ресурсларидан самарали фойдаланиш, сув танқислиги билан боғлиқ хавфларни камайтириш, эҳтимолий келишмовчиликларнинг олдини олиш ҳамда минтақавий сув ҳамкорлигини мустаҳкамлаш учун муҳим ҳуқуқий асос бўлиб хизмат қилади.

 

Маълумот учун, Ўзбекистон ва Қозоғистон Сирдарё ҳавзасидаги трансчегаравий сув ресурсларидан биргаликда фойдаланади. Ушбу сувлар ҳар икки мамлакатда қишлоқ хўжалигини суғориш, аҳолини ичимлик суви билан таъминлаш, электр энергияси ишлаб чиқариш ва экологик барқарорликни сақлашда муҳим аҳамият касб этади.

 

Эслатиб ўтамиз, мазкур битим Ўзбекистон томонидан 2026 йил 6 мартдаги Президентнинг ПҚ-88-сон қарори билан тасдиқланган эди.