Жанубий Корея ва АҚШга ноқонуний юборишни ваъда қилган “уддабуронлар” ушланди

 

Давлат хавфсизлик хизмати томонидан Ички ишлар органлари билан ҳамкорликда ўтказилган тезкор тадбирлар давомида фуқароларни Жанубий Корея ва АҚШга ноқонуний юборишни ваъда қилган шахсларнинг ноқонуний фаолиятига чек қўйилди. Бу ҳақда ДХХ хабар берди.

 

Биринчи ҳолатда, Тошкент шаҳрида яшовчи 1994 ва 1999 йилларда туғилган икки нафар фуқаро ўзаро тил бириктириб, фуқароларни танишлари орқали «Г-1» визаси олиб бериш йўли билан Жанубий Кореяга ишга юбориш, кейинчалик эса ушбу давлатда доимий яшаш ҳуқуқини берувчи ҳужжатларни расмийлаштириб беришни ваъда қилган.

 

Улар ушбу хизмат эвазига 55 минг АҚШ доллари талаб қилиб, олдиндан 25 минг АҚШ долларини олаётган вақтида ДХХ Тошкент шаҳар бошқармаси ҳамда Иқтисодий жиноятларга қарши курашиш департаменти ходимлари томонидан ашёвий далиллар билан қўлга олинган.

 

Иккинчи ҳолатда эса Наманган вилояти Косонсой туманида яшовчи, 2001 йилда туғилган, аввал Жиноят кодексининг 168-моддаси (фирибгарлик) билан судланган фуқаро бошқа бир шахсни ноқонуний йўллар билан АҚШга юборишни ваъда қилган.

 

У фуқарони “Ўзбекистон – Туркия – Испания – Мексика – АҚШ” йўналиши орқали юборишни таклиф қилиб, бунинг эвазига 50 минг АҚШ доллари талаб қилган.

 

ДХХ ҳамда Иқтисодий жиноятларга қарши курашиш департаменти ходимлари томонидан Тошкент шаҳрида ўтказилган тезкор тадбир давомида гумонланувчи келишилган маблағнинг бир қисми — 20 минг АҚШ долларини олаётган вақтида ушланди.

 

Мазкур ҳолатлар юзасидан гумонланувчиларга нисбатан жиноят ишлари қўзғатилиб, тергов ҳаракатлари олиб борилмоқда.