Қорақалпоғистонда иссиқ сабаб боғчалар вақтинча ёпилади
Чекловлар 13 июлдан бошланиб, ҳудудларга қараб 15–18 июлгача амал қилади.
Қорақалпоғистон Республикасининг айрим ҳудудларида ҳаво ҳароратининг кескин кўтарилиши муносабати билан давлат ва нодавлат мактабгача таълим ташкилотлари фаолияти вақтинча тўхтатилади. Бу ҳақда Қорақалпоғистон Республикаси Мактабгача ва мактаб таълими вазирлиги маълум қилди.
Қайд этилишича, шаҳар ва туман ҳокимларининг қарорларига асосан:
- Нукус шаҳридаги боғчалар 13–18 июль кунлари;
- Амударё туманида 13–15 июль;
- Беруний туманида 13–17 июль;
- Хўжайли туманида 13–18 июль;
- Тахиатош, Шуманай, Мўйноқ, Қонликўл ва Тўрткўл туманларида эса 13–17 июль кунлари фаолиятини вақтинча тўхтатади.
Вазирликка кўра, мазкур қарор болаларнинг соғлиғини жазирама иссиқнинг салбий таъсиридан ҳимоя қилиш ҳамда уларнинг хавфсизлигини таъминлаш мақсадида қабул қилинган. Фаолиятни вақтинча тўхтатиш Санитария-эпидемиологик осойишталик ва жамоат саломатлиги бўлимларининг тегишли хулосалари ҳамда тавсияларига мувофиқ амалга оширилади.
Шунингдек, ота-оналарга фарзандлари саломатлигига алоҳида эътибор қаратиш, куннинг энг иссиқ вақтларида уларнинг очиқ ҳавода узоқ вақт бўлишига йўл қўймаслик ва зарур эҳтиёт чораларига риоя қилиш тавсия этилди.
