Ўзбекистонда Жаҳон Ислом цивилизацияси альянси тузилади

Тошкент шаҳрида ўтказилган I Халқаро ислом цивилизацияси форуми якунида 10 та муҳим ташаббусни ўз ичига олган Декларация бир овоздан қабул қилинди. Бу ҳақда Дин ишлари бўйича қўмита матбуот хизмати хабар берди.

 

Ҳужжатга мувофиқ, Ўзбекистондаги Ислом цивилизацияси маркази негизида Жаҳон Ислом цивилизацияси альянсини ташкил этиш ташаббуси ҳам қўллаб-қувватланди.

 

Маълум қилинишича, форумда 40 дан ортиқ давлатдан 300 га яқин хорижий иштирокчи қатнашган. Улар Декларацияда назарда тутилган мазкур ташаббусни бир овоздан маъқуллаган.

 

Қайд этилишича, Жаҳон Ислом цивилизацияси альянси таркибига халқаро ташкилотлар, илмий ва таълим муассасалари, фанлар академиялари, музейлар, кутубхоналар, архивлар, ислом қўлёзмалари марказлари, тадқиқот институтлари ҳамда бошқа ихтисослашган ташкилотлар бирлаштирилади.

 

Альянснинг асосий мақсади узоқ муддатли халқаро ҳамкорликни ривожлантириш, қўшма илмий, таълимий, маданий, музей ва рақамли лойиҳаларни амалга ошириш, билим ва илғор тажриба алмашинувини рағбатлантириш, шунингдек, ислом цивилизациясининг жаҳон маданий ва интеллектуал меросидаги  асраш, илмий ўрганиш ва кенг тарғиб этишга қаратилган саъй-ҳаракатларни бирлаштиришдан иборат.

 

Ислом цивилизацияси меросини ўрганиш, асраш ва оммалаштириш, илм-фан, таълим, маданиятлараро мулоқот ва гуманитар ҳамкорликни ривожлантиришга қўшилган улкан ҳиссани муносиб тақдирлаш мақсадида халқаро мукофот таъсис этилади.

 

Маълумот учун, Президент Шавкат Мирзиёев ташаббуси билан ташкил этилган “Тинчлик, бағрикенглик ва маърифат йўли” мавзусидаги I Халқаро ислом цивилизацияси форуми 7 июль куни ўз ишини бошлаган. Форум Тошкент, Самарқанд ва Термиз шаҳарларида ўтказилиб, унинг дастуридан 11 та ялпи мажлис ва 4 та халқаро конференция ўрин олган.