Бангкокдаги барда юз берган ёнғин оқибатида 27 киши ҳалок бўлди
60 дан ортиқ киши жароҳатланган, айрим шахслар бедарак йўқолган
Таиланд пойтахти Бангкокнинг Чатучак туманидаги барда юз берган ёнғин оқибатида камида 27 киши ҳалок бўлди, 60 дан ортиқ киши жароҳатланди. Бу ҳақда BBС хабар берди.
Таиланд расмийлари маълумотига кўра, ҳалок бўлганлар орасида 9 нафар эркак ва 18 нафар аёл бор. Жароҳатланганлар шифохоналарга етказилган бўлиб, уларнинг 8 нафари оғир аҳволда экани маълум қилинган. Шунингдек, айрим шахслар бедарак йўқолгани ҳам хабар қилинмоқда.
Дастлабки маълумотларга кўра, ёнғин электр тақсимлаш панели яқинида бошланган. Таиланд Бош вазири Анутҳин Чанвиракуннинг айтишича, воқеа жойида бўлган мусиқачи олов жуда қисқа вақт ичида бутун бинони қамраб олганини билдирган.
Бош вазирнинг сўзларига кўра, кўплаб одамлар бинонинг орқа қисмида бўлгани сабабли ташқарига чиқишга улгурмаган. Айримлари олов ва тутундан қочиб, ҳожатхонага яширинган, қутқарувчилар эса қурбонларнинг аксариятини айнан шу ердан топган.
Ўт ўчирувчилар ёнғинни тахминан 30 дақиқа ичида тўлиқ назорат остига олган.
Воқеа жойидан олинган тасвирларда бино ички қисми деярли тўлиқ ёниб кетгани, девор ва мебеллар куйиб кул бўлгани ҳамда шифтнинг бир қисми қулаб тушгани акс этган.
Бангкок губернатори Чадчарт Ситтипунт ёнғин тез тарқалишига бино ичидаги ёнувчан материаллар сабаб бўлганини таъкидлаган.
Ҳозирда ёнғин сабаблари юзасидан расмий тергов ҳаракатлари олиб борилмоқда.
