Хитойга қарамликни камайтириш Ғарбга 23,6 триллион долларга тушиши мумкин

АҚШ ва Европанинг муҳим технологик ҳамда ишлаб чиқариш тармоқларида Хитойга қарамликни камайтириши келгуси 25 йил ичида 23,6 триллион доллар миқдорида қўшимча инвестицияларни талаб қилади. Бу ҳақда Financial Times нашрига таяниб, Point.md хабар берди.

 

Ҳисоб-китобларга кўра, 2050 йилгача АҚШга 13,7 триллион доллар, евро ҳудудига 9,1 триллион доллар, Буюк Британияга эса 800 миллиард доллар инвестиция зарур бўлади. Мутахассисларнинг таъкидлашича, Европа Иттифоқи учун бу деярли йиллик бюджетни икки баравар ошириш билан тенг.

 

Ҳисобот муаллифлари Хитой маҳсулотларидан тўлиқ воз кечиш амалда имконсизлигини қайд этган. Бунга Хитойнинг литий ва кобальтнинг 60 фоиздан ортиғи, шунингдек, графит ҳамда нодир ер металларининг қарийб 80 фоизи етказиб берилишини назорат қилаётгани сабаб сифатида кўрсатилган.

 

Шунингдек, Хитой маҳсулотлари кўплаб маҳаллий муқобилларга нисбатан сезиларли даражада арзон экани, уларни алмаштириш эса инфляцияни тезлаштириши мумкинлиги таъкидланган. Ҳисоботга кўра, Европада айрим стратегик тармоқларда нархлар 1–2,5 фоизга ошиши эҳтимоли бор.

 

Экспертлар энг мақбул ечим сифатида “қисман ажралиш” стратегиясини таклиф қилмоқда. Унга кўра, энг заиф таъминот занжирларини мустаҳкамлаш учун танлаб инвестиция киритиш орқали давлат ва бизнес зиммасига тушадиган молиявий юкни камайтириш мумкин.