Парижда Украина ҳаво мудофаасини кучайтириш масаласи муҳокама қилинади
"Coalition of the Willing" саммитида Украинага ҳарбий ёрдамни кучайтириш ва Россияга қарши янги санкциялар масаласи кўриб чиқилади.
Франция пойтахти Парижда 13 июль куни бўлиб ўтадиган "Coalition of the Willing" саммитида Украинага қўшимча ҳаво ҳужумидан мудофаа тизимларини етказиб бериш масаласи асосий мавзулардан бири бўлади.
Саммитда Украина президенти Владимир Зеленский билан бир қаторда камида 25 давлат раҳбарлари ва ҳукумат вакилларининг иштирок этиши кутилмоқда. НАТОнинг сўнгги саммитидан кейинги илк йирик сиёсий учрашувда Украинага ҳарбий ёрдамни жадаллаштириш ҳамда Россияга нисбатан иқтисодий босимни кучайтириш масалалари муҳокама қилинади.
Reuters дипломатик манбаларга таяниб хабар беришича, музокараларда асосий эътибор АҚШ ишлаб чиқарган Патриот зенит-ракета мажмуалари учун қўшимча ракеталарни топиш ва уларни Украинага тезкор етказиб беришга қаратилади.
Шунингдек, Франция ва Италия ҳамкорлигида ишлаб чиқарилган SAMP/T ҳаво ҳужумидан мудофаа тизимлари имкониятларини кенгайтириш, Европада янги ракетага қарши мудофаа тизимларини яратиш ҳамда ушбу лойиҳаларга Украина мудофаа саноатини жалб этиш масалалари ҳам кун тартибидан ўрин олади.
Сўнгги ҳафталарда Россия томонидан Киев ва бошқа шаҳарларга баллистик ракеталар билан уюштирилаётган ҳужумлар кучайгани фонида Украина мавжуд Патриот тизимлари учун ракеталар танқислигига дуч келганини билдирган. Шу сабаб президент Владимир Зеленский Ғарб давлатларини ҳаво мудофаасини мустаҳкамлаш бўйича қарорларни тезлаштиришга чақириб келмоқда.
Саммит давомида фақат ҳарбий ёрдам эмас, балки Россияга қарши иқтисодий босимни кучайтириш масалалари ҳам муҳокама қилинади. Жумладан, Россиянинг нефть экспортида фойдаланаётган "соя флоти"га нисбатан янги чекловлар ҳамда Европа Иттифоқининг тайёрланаётган 21-санкциялар пакети бўйича умумий ёндашувни ишлаб чиқиш режалаштирилган.
Бундан ташқари, Франция ҳукумати Украина билан мудофаа саноати соҳасида янги икки томонлама ҳамкорлик битимларини эълон қилиши, қўшма ҳарбий машғулотлар ва халқаро хавфсизлик коалицияси фаолиятини кенгайтириш масалалари ҳам кўриб чиқилиши кутилмоқда.
