Шавкат Мирзиёев Бекободда замонавий Қуюв-прокатлаш мажмуасини ишга туширди
Янги мажмуа йилига 1 миллион тонна иссиқ прокатланган пўлат лист ишлаб чиқариш қувватига эга бўлиб, 1 200 та янги иш ўрни яратади.
Шавкат Мирзиёев Бекобод шаҳрига ташрифи доирасида Ўзбекистон металлургия комбинатида барпо этилган замонавий Қуюв-прокатлаш мажмуасини тантанали равишда ишга туширди.
Маросимда давлат раҳбари комбинат жамоаси, меҳнат фахрийлари ва хорижий ҳамкорларни ушбу муҳим лойиҳа билан табриклаб, сўнгги йилларда мамлакатда кон-металлургия саноатини замонавий технологиялар асосида ривожлантириш бўйича кенг кўламли ислоҳотлар амалга оширилаётганини таъкидлади.
Қайд этилишича, ўтган ўн йилда соҳага қарийб 2 миллиард доллар хорижий инвестиция жалб этилиб, 31 та йирик ишлаб чиқариш қуввати ишга туширилган. Натижада маҳаллий металл маҳсулотлари ишлаб чиқариш ҳажми йилига 3 миллион тоннага, қиймати эса 23 триллион сўмга етди.
Янги Қуюв-прокатлаш мажмуаси мамлакатда иссиқ прокатланган пўлат листлар ишлаб чиқариш бўйича илк йирик лойиҳа ҳисобланади. Мажмуа йилига 1 миллион тонна иссиқ прокатланган пўлат лист ишлаб чиқариш қувватига эга бўлиб, 8 триллион сўмлик маҳсулот ишлаб чиқаришни таъминлайди. Шунингдек, Тошкент ва Самарқанд металлургия заводларининг ушбу маҳсулотга бўлган эҳтиёжи тўлиқ қопланади ҳамда 1 200 та юқори даромадли янги иш ўрни яратилади.
Таъкидланишича, лойиҳа энергия тежамкор технологиялар ва замонавий рақамли ечимлар асосида қурилган бўлиб, меҳнат унумдорлиги ҳамда маҳсулот сифатини оширишга хизмат қилади. Шу билан бирга, эски турдаги ишлаб чиқариш қувватларини босқичма-босқич модернизация қилиш имконини беради.
Тадбир давомида комбинатни янада ривожлантириш бўйича истиқболдаги режалар ҳам маълум қилинди. Хусусан, яқин йилларда «Тебинбулоқ» ва «Сурун-ота» конлари негизида маҳаллий темир рудасини қайта ишлаш ҳажмини кенгайтириш, қиймати 180 миллион долларлик янги металлургия заводини барпо этиш, пўлат шарлар ишлаб чиқариш қувватини икки баробарга ошириш ҳамда комбинат ҳудудида “Ўзбекистон экологик технологиялар саноат парки”ни ташкил этиш режалаштирилган.
Маросим якунида Президент рамзий тугмани босиб, янги Қуюв-прокатлаш мажмуаси фаолиятига расман старт берди ҳамда комбинат ходимлари, меҳнат фахрийлари ва хорижий ҳамкорлар билан мулоқот қилди.
