Тошкент метрополитенига яна 3 та замонавий метро поезди олиб келинди
Йил охиригача Тошкент метрополитенига яна 11 та янги поезд олиб келиш режалаштирилган.
Тошкент метрополитенига яна 3 та замонавий тўрт вагонли ҳаракат таркиби олиб келинди. Бу ҳақда Метрополитен матбуот хизмати маълум қилди.
Қайд этилишича, мамлакатда жамоат транспорти тизимини ривожлантириш, йўловчиларга кўрсатилаётган хизматлар сифатини ошириш ҳамда замонавий ва қулай транспорт инфратузилмасини яратиш бўйича изчил ишлар давом эттирилмоқда. Шу мақсадда Тошкент метрополитенининг моддий-техник базаси босқичма-босқич янгиланмоқда.
Йўловчиларнинг талаб ва таклифларини инобатга олган ҳолда олиб келинган 3 та замонавий тўрт вагонли янги поездлар ёз мавсумида самарали совутиш, қиш мавсумида эса иситиш тизими билан жиҳозланган бўлиб, йўловчилар учун янада қулай сафар шароитини таъминлайди.
Янги ҳаракат таркибларининг фойдаланишга топширилиши метро поездлари ҳаракати интервалини қисқартириш, йўловчиларга кўрсатилаётган хизмат сифатини яхшилаш ҳамда эксплуатация муддати узоқ бўлган эски турдаги поездларни босқичма-босқич замонавий таркиблар билан алмаштириш имконини беради.
Шунингдек, замонавий поездлар сонининг кўпайиши метрополитеннинг ташиш қувватини ошириш, ҳаракат жадвалининг барқарорлигини таъминлаш ва кун сайин ортиб бораётган йўловчилар оқимига сифатли хизмат кўрсатишда муҳим аҳамият касб этади.
Маълум қилинишича, жорий йил якунига қадар Тошкент метрополитенига яна 11 та замонавий ҳаракат таркибини олиб келиш режалаштирилган.
