Тошкент вилояти, Самарқанд ва Сурхондарёда ҳам темир захиралари борлиги прогноз қилинмоқда
Хусусий металлургия корхоналарини қўллаб-қувватлаш мақсадида 200 миллион долларлик махсус компания ташкил этилиб, импорт хомашё биржа орқали реализация қилинади.
Шавкат Мирзиёев раислигида қора металлургия саноатини янги босқичга олиб чиқиш бўйича устувор вазифалар юзасидан ўтаётган йиғилишда қора металлургия саноатининг хомашё базасини кенгайтириш ва хусусий секторни қўллаб-қувватлаш масалалари муҳокама қилинди.
Қайд этилишича, Тошкент вилояти, Самарқанд ва Сурхондарё ҳудудларида ҳам темир рудаси захиралари мавжуд бўлиши прогноз қилинмоқда.
Давлат раҳбари бундай йирик металлургия лойиҳаларини амалга оширишда темир сифати ва маҳсулот рақобатбардошлигини ошириш учун марганец ҳамда ферросилитсий каби хомашёга эҳтиёж ортишини таъкидлади.
Шу муносабат билан мутасаддиларга ушбу майдонларни сунъий интеллект ёрдамида таҳлил қилиб, бир ойда темир ва уни бойитишга зарур минераллар захирасини кўпайтириш бўйича геология дастурини киритиш топширилди.
Ҳудудлар раҳбарларига эса ушбу лойиҳаларни амалга оширишга йирик тадбиркорларни кенг жалб этиш вазифаси юклатилди.
Йиғилишда металлургия соҳасида бугунги кунда 150 га яқин ўрта ва кичик хусусий корхона фаолият юритаётгани қайд этилди. Қурилиш материаллари соҳасига бағишланган йиғилишдан сўнг ҳудудларда металл маҳсулотлари ишлаб чиқариш бўйича қатор янги лойиҳалар бошланганига алоҳида эътибор қаратилди.
Хусусий корхоналарни хомашё билан узлуксиз ва барқарор таъминлаш мақсадида импорт хомашёсини марказлашган тартибда харид қилувчи алоҳида компания ташкил этилиши белгиланди.
Мазкур компания фаолиятини йўлга қўйиш учун 200 миллион доллар маблағ ажратилади. Шунингдек, импорт қилинадиган металлургия хомашёси фақат биржа савдолари орқали реализация қилиниши белгиланди.
