Тошкент–Бекобод йўналишида электропоезд қатнови йўлга қўйилди

 

Шавкат Мирзиёев электропоездда Тошкент шаҳридан Бекободга ташриф буюрди. Ташриф давомида Тошкент–Бекобод йўналишида йўлга қўйилган янги электропоезд қатнови ва темир йўл инфратузилмасини ривожлантириш бўйича амалга оширилаётган ишлар билан танишилди. Бу ҳақда Президент матбуот хизмати хабар берди.

Мазкур лойиҳа давлат раҳбарининг 2025 йил 27 декабрда қабул қилинган “2030 йилгача темир йўл транспортида маҳаллий йўналишларда йўловчи ташиш кўрсаткичларини ошириш чора-тадбирлари тўғрисида”ги қарори асосида амалга оширилмоқда. Ҳужжатга мувофиқ, ҳудудларда транспорт инфратузилмаси модернизация қилиниб, маҳаллий темир йўл қатновлари босқичма-босқич кенгайтирилмоқда.

Бекобод темир йўл вокзалида Президентга пойтахт ва Бекободни боғловчи янги йўналиш бўйича бажарилган ишлар юзасидан ахборот берилди.

Маълум қилинишича, 192 километрлик Тошкент–Бекобод йўналиши орқали кунига қарийб 1 минг, йилига эса 300 минг нафаргача йўловчига хизмат кўрсатиш режалаштирилган. Мазкур йўналишда олти вагондан иборат, 586 нафар йўловчига мўлжалланган замонавий электропоезд ҳаракатланади. Поезднинг максимал тезлиги соатига 120 километрни ташкил этади.

Электропоезд ногиронлиги бўлган шахслар учун махсус кўтаргичлар, кондиционер ва иситиш тизимлари, юмшоқ ўриндиқлар, USB қувватлаш нуқталари, Wi-Fi, видеокузатув тизими, электрон ахборот таблолари ҳамда велосипедлар учун махсус жойлар билан жиҳозланган.

Қайд этилишича, янги қатнов йўлга қўйилиши автомобиль йўлларидаги транспорт юкламасини камайтириш, экологик тоза транспорт улушини ошириш ҳамда аҳоли учун қулай ва замонавий транспорт хизматларини кенгайтиришга хизмат қилади.

Ташриф давомида Президент темир йўл инфратузилмасини янада ривожлантириш, тармоқларни электрлаштириш, вокзалларда хизмат кўрсатиш сифатини ошириш ва темир йўлга туташ ҳудудларни ободонлаштириш юзасидан масъулларга тегишли топшириқлар берди.