Тошкентда пулли автотураргоҳ учун тўлов қилмаган ҳайдовчиларни жаримага тортиш таклиф этилди

Тошкент шаҳар ҳокимлиги йўл бўйидаги пулли автотураргоҳлардан фойдаланганлик учун тўловни ўз вақтида амалга оширмаган ёки ундан бўйин товлаган ҳайдовчиларга нисбатан маъмурий жавобгарлик жорий этишни назарда тутувчи қонун лойиҳасини жамоатчилик муҳокамасига қўйди.

 

Лойиҳага кўра, Маъмурий жавобгарлик тўғрисидаги кодекс янги 128¹¹-модда билан тўлдирилади. Унга мувофиқ, йўл бўйидаги пулли автотураргоҳдан фойдаланганлик учун тўловни белгиланган муддатда амалга оширмаслик ёки тўловдан бўйин товлаш базавий ҳисоблаш миқдорининг (БҲМ) икки баравари миқдорида жаримага сабаб бўлади.

 

Ўзбекистонда 2026 йил 1 сентябрдан БҲМ 440 минг сўм этиб белгиланади. Шундан келиб чиқиб, мазкур ҳуқуқбузарлик учун жарима миқдори 880 минг сўмни ташкил этади.

 

Қонун лойиҳасида бундай ҳуқуқбузарликларни махсус автоматлаштирилган фото ва видео қайд этиш воситалари ҳамда ахборот тизимлари орқали аниқлаш назарда тутилган. Шу билан бирга, қонунчиликка мувофиқ пулли автотураргоҳлардан бепул ёки имтиёзли фойдаланиш ҳуқуқига эга шахсларга ушбу жавобгарлик татбиқ этилмайди.

 

Лойиҳа изоҳида қайд этилишича, мазкур ташаббус йўл инфратузилмасини ривожлантириш, тирбандликларни камайтириш ҳамда пулли автотураргоҳлардан фойдаланиш қоидаларига риоя этилишини таъминлаш мақсадида ишлаб чиқилган.

 

Маълумот учун, Тошкент шаҳридаги йўл бўйидаги пулли автотураргоҳлар Пойтахт Паркинг оператори томонидан ташкил этилади. “Streetpark Systems” МЧЖ эса умумий фойдаланишдаги автомобиль йўлларида жойлашган пулли тўхтаб туриш жойларидан фойдаланиш хизматларини кўрсатиш бўйича устун музокара ҳуқуқига эга оператор сифатида белгиланган.