Тожикистондан йилига 700 минг тонна темир хомашёси олиб келинади

 

Шавкат Мирзиёев раислигида қора металлургия саноатини янги босқичга олиб чиқиш бўйича устувор вазифалар юзасидан ўтаётган йиғилишда мамлакатда мавжуд 1,5 миллиард тонна темир руда захирасидан самарали фойдаланиш масалалари муҳокама қилинди.

 

Қайд этилишича, «Сурун-ота» конидан йилига 650 минг тонна темир хомашёси олиш бўйича хитойлик ҳамкорлар билан келишувга эришилган. Ушбу кондан темир концентрати 2027 йилдан бошлаб Бекобод металлургия комбинатига етказиб берилади.

 

Шунингдек, «Тебинбулоқ» конини уч-тўрт йил ичида ишга тушириш орқали йилига 1 миллион тонна пўлат ишлаб чиқариш имконияти яратилади.

 

Йиғилишда Тожикистондан йилига 700 минг тонна темир хомашёсини сотиб олиш бўйича меморандум имзолангани қайд этилиб, тез фурсатда шартномани расмийлаштириш ва келгуси йилдан хомашё олиб келишни бошлаш вазифаси қўйилди.

 

Шунингдек, йирик хусусий корхоналар геология-қидирув ишлари ва конларни ўзлаштиришга тайёр экани қайд этилди. Самарқанддаги корхона темир кони ажратилса, 500 миллион долларгача инвестиция киритишга тайёрлигини билдирган. Бекобод металлургия комбинати эса Форишдаги 32 миллион тонна темир ресурсига эга «Темиркон» конини ўзлаштиришни таклиф қилди.

 

Президент ушбу лойиҳаларни амалга ошириш учун зарур шароитларни яратиш юзасидан мутасаддиларга тегишли топшириқлар берди.