Ўзбекистонда жазирама сабаб электр энергияси истеъмоли рекорд даражага етиши кутилмоқда

 

Ўзбекистонда кутилаётган аномал иссиқ об-ҳаво сабаб электр энергияси истеъмоли рекорд даражага етиши прогноз қилинмоқда. Бу ҳақда Энергетика вазирлиги маълум қилди.

 

Қайд этилишича, Республика штабининг ёқилғи-энергетика ресурсларидан фойдаланиш устидан давлат назоратини мувофиқлаштиришга бағишланган навбатдаги йиғилишида ёзнинг энг иссиқ кунларида республика бўйича суткалик электр энергияси истеъмоли 280 миллион кВт/соат, максимал юклама эса 13–13,3 ГВтгача етиши кутилаётгани билдирилган.

 

Шу муносабат билан барча энергетика корхоналарига электр узатиш тармоқлари ва подстанцияларнинг узлуксиз ишлашини таъминлаш, авариявий ҳолатларнинг олдини олиш ҳамда профилактик назоратни кучайтириш бўйича қўшимча топшириқлар берилган.

 

Йиғилишда ёз мавсумини талафотларсиз ўтказиш, электр энергиясига талаб кескин ошадиган кунларда истеъмолчиларни узлуксиз таъминлаш, энергетика объектларининг 24 соатлик иш режимини кучайтириш, авария бригадаларининг шайлигини ошириш ва режали таъмирлаш ишларини жадаллаштириш масалалари ҳам муҳокама қилинган.

 

Шунингдек, Тошкент шаҳридаги айрим подстанцияларда кузатилган носозликлар танқидий кўриб чиқилган. Йўл қўйилган камчиликлар учун масъул раҳбарларнинг шахсий жавобгарлиги белгиланди, айрим раҳбарлар эса эгаллаб турган лавозимидан озод этилган.

 

Бундан ташқари, юқори ҳаво ҳарорати шароитида бензин, дизель ёқилғиси ва суюлтирилган газни ортиш-тушириш ишларини саноат ҳамда ёнғин хавфсизлиги талабларига қатъий риоя этган ҳолда ташкил этиш топширилди. Ёнғин ва портлаш хавфини камайтириш мақсадида ҳаво ҳарорати энг юқори бўлган соатларда суюлтирилган газни ортиш-тушириш ишлари вақтинча тўхтатилади.

 

Мазкур талаблар ижросини назорат қилиш учун Фавқулодда вазиятлар вазирлиги, Бош прокуратура, «Ўзенергоинспекция» ҳамда Саноат, радиация ва ядро хавфсизлиги қўмитаси ҳамкорлигида республика бўйлаб энергетика объектлари ва ёқилғи инфратузилмасида кучайтирилган назорат рейдлари ўтказилади.

 

Эслатиб ўтамиз, Ўзбекистонда кунлик электр энергияси истеъмоли бўйича амалдаги рекорд 2025 йил 18 июль куни қайд этилган бўлиб, ўшанда истеъмол ҳажми 272,6 миллион кВт/соатни ташкил этган эди.