Қашқадарёда 3 кишида қутуриш касали аниқландими?
Ижтимоий тармоқда тарқалган хабарлар юзасидан ССВ муносабат билдирди.
Қашқадарё вилояти Соғлиқни сақлаш бошқармаси ижтимоий тармоқларда Китоб тумани «Варганза» маҳалласида бир оиланинг уч нафар аъзосида қутуриш касаллиги аниқлангани ҳақида тарқалган хабарлар юзасидан расмий маълумот берди.
Маълум қилинишича, жорий йил 10 июль куни Китоб туманида яшовчи 1979 йилда туғилган фуқаро хавфли юқумли касаллик гумони билан шифохонага ётқизилган. Эпидемиологик суриштирув давомида фуқаро тахминан бир ой аввал тулки боласи томонидан тирналгани аниқланган. У 11 июль куни вафот этган.
Ҳозирда марҳумнинг ўлим сабабини аниқлаш мақсадида суд-тиббий экспертиза тайинланган.
Шунингдек, марҳум билан алоқада бўлган уч нафар фуқаро эҳтиёт чораси сифатида тиббий кўрикдан ўтказилган. Текширувлар давомида уларда қутуриш касаллигининг клиник белгилари аниқланмаган. Айни пайтда улар шифокорлар назоратига олиниб, зарур профилактик эмлаш тадбирлари ўтказилмоқда.
Қайд этилишича, Китоб туманидаги эпидемиологик вазият вилоят Соғлиқни сақлаш бошқармаси, Санитария-эпидемиологик осойишталик ва жамоат саломатлиги хизмати ҳамда ветеринария мутахассислари ҳамкорлигида тўлиқ назоратга олинган.
Мутасаддилар фуқаролардан ортиқча хавотирга берилмасликни ҳамда ижтимоий тармоқларда асоссиз ва тасдиқланмаган маълумотларни тарқатмасликни сўради.
