“Бу пиар ҳам, болаларни сиёсатга жалб қилиш ҳам эмас” — Садир Жапаров қизи ҳақидаги баҳсларга муносабат билдирди

 

Қирғизистон президенти Садир Жапаров қизи Жанайимнинг болалар реабилитация марказига ташрифи ортидан ижтимоий тармоқларда тарқалган муҳокамаларга муносабат билдирди. Бу ҳақда “AKIpress” хабар берди.

 

Президентнинг сўзларига кўра, қизининг “Олтин болалик” марказида болаларга совғалар улашгани акс этган видео сиёсий мақсад ёки пиар билан боғлиқ эмас.

 

“Фарзандларим ёки яқинларимнинг сиёсат ва давлат ишларига аралашишига ҳеч қачон йўл қўймайман. Агар шундай бўлганида, бу аллақачон барчага маълум бўларди”, — деган Садир Жапаров.

 

Унинг таъкидлашича, “Олтин болалик” болалар реабилитация маркази унинг топшириғи билан қурилиши якунланган бўлиб, бу ерда ҳар йили мамлакатнинг турли ҳудудларидан келган, айниқса кам таъминланган оилалар фарзандлари дам олади. Одатда болаларга совғаларни биринчи хоним Айгул Жапарова топширади.

 

Президентнинг маълум қилишича, тадбир куни у рафиқаси билан бошқа тадбирда бўлгани сабабли Айгул Жапарова қизи Жанайимдан болаларни хафа қилмаслик учун марказга бориб, совғаларни топширишни сўраган. Жанайим болалар учун тайёрланган спорт кийимларини тарқатишда ёрдам берган ва тадбирдан сўнг дарҳол марказни тарк этган.

 

Жапаровнинг қайд этишича, тадбирга оммавий ахборот воситалари таклиф қилинмаган ва уни оммага намойиш этиш режалаштирилмаган. Видео эса тадбир иштирокчиларидан бири томонидан мобил телефонда тасвирга олиниб, ижтимоий тармоқларга жойлаштирилган.

 

Президент ушбу ҳолатга сиёсий мазмун юклаш учун асос йўқлигини таъкидлаган.