“Реал Санжик” иши бўйича апелляция шикояти кўриб чиқилмоқда
Тошкент шаҳар суди апелляция жараёни давом этаётгани ва адвокатнинг шикояти юзасидан расмий изоҳ берди.
Фирибгарлик ва бошқа жиноятларни содир этишда айбдор деб топилган С. Каримов (“Реал Санжик”)га оид жиноят иши Тошкент шаҳар судининг жиноят ишлари бўйича судлов ҳайъати апелляция инстанциясида кўриб чиқилмоқда.
Тошкент шаҳар судлари матбуот хизматининг маълум қилишича, айрим оммавий ахборот воситаларида судланувчи ҳимоячиларидан бири томонидан апелляция шикояти қабул қилинмагани ва шу сабаб суд мажлиси асоссиз қолдирилаётгани ҳақида тарқалган хабарлар ҳақиқатга тўғри келмайди.
Аниқланишича, адвокат апелляция шикоятини аввал айтилганидек 18 май куни эмас, балки 30 июнь куни туман судига электрон шаклда тақдим этган. Шикоят бериш муддати ўтган бўлсада, ҳукм ҳали қонуний кучга кирмагани ҳамда иш бошқа ҳимоячилар томонидан ўз вақтида берилган апелляция шикоятлари асосида кўриб чиқилаётгани инобатга олиниб, адвокатнинг муддатни тиклаш ҳақидаги илтимосномаси қаноатлантирилган.
Натижада адвокат О. Ашуров бошқа ҳимоячилар қатори бугунги суд мажлисида иштирок этган.
Тошкент шаҳар суди матбуот хизмати одил судловни амалга оширишда адвокатларнинг ўрни муҳим эканини таъкидлаб, оммавий ахборот воситалари орқали шахсий ҳуқуқий позицияни аниқ тасдиқланган факт сифатида талқин қилиш жамоатчиликни чалғитиши мумкинлигини қайд этди.
Мазкур жиноят иши бўйича навбатдаги суд мажлиси 20 июль куни давом эттирилади.
