Тошкент вилоятидаги боғчаларда болалар заҳарланиши иши бўйича суд ҳукми эълон қилинди

 

Жиноят ишлари бўйича Бўка туман судида 2025 йил сентябрь ойида Тошкент вилоятининг Бекобод, Бўка, Оққўрғон, Пискент ва Қуйичирчиқ туманларидаги давлат мактабгача таълим муассасаларида юз берган болаларнинг оммавий заҳарланиши билан боғлиқ жиноят иши бўйича суд жараёни якунланди. Суд ҳукмига кўра, иш бўйича айбланган 11 нафар шахс айбдор деб топилди.

 

Олий суд матбуот хизматининг маълум қилишича, судланувчилар Жиноят кодексининг 257¹-моддаси 1-қисми (санитарияга оид қонунчиликни ёки эпидемияга қарши кураш қоидаларини бузиш) билан айбдор деб топилган.

 

Суд ҳукмига кўра, "Shark Milk Product" МЧЖ директори Р.О., бош технолог А.С. ва технолог Р.Х.га 3 йил 6 ой муддатга озодликдан маҳрум қилиш жазоси тайинланди.

 

Корхона таъсисчиси ва сотув бўлими менежери С.С., таъсисчи ва директор ўринбосари Ф.О. ҳамда технолог ёрдамчиси М.Н. 3 йил муддатга озодликдан маҳрум этилди.

 

Шунингдек, "Governess Business", "Innavation Outsourcing Servise", "Nishon Invest", "Kinder Garden Group" МЧЖлари директорларига ҳамда "Shark Milk Product" лаборатория ходимига 3 йил муддатга озодликни чеклаш жазоси тайинланди.

 

Суд ҳукми билан барча судланувчиларга Жиноят кодексининг 45-моддаси асосида муайян ҳуқуқлардан маҳрум қилиш тарзидаги қўшимча жазо ҳам белгиланди. Томонлар ҳукм устидан қонунда белгиланган тартибда апелляция ёки кассация шикояти бериш ҳуқуқига эга.

 

Мазкур иш 2025 йил сентябрь ойида Тошкент вилоятидаги бешта тумандаги давлат боғчаларида болаларнинг оммавий заҳарланиши ортидан қўзғатилган эди. Дастлаб болаларда юқори иситма, кўнгил айниши, қайт қилиш ва ич кетиши каби аломатлар кузатилган. Тиббий текширувлардан сўнг уларга озиқ-овқат токсикоинфекцияси ташхиси қўйилган.

 

Соғлиқни сақлаш вазирлиги маълумотларига кўра, ҳодисадан сўнг 1 922 нафар тарбияланувчи тиббий кўрикдан ўтказилган. Уларнинг 960 нафарга яқини шифохонага ётқизилган, қолган болаларга амбулатор ёрдам кўрсатилган. Кейинчалик барча болалар соғайгани маълум қилинган.

 

Тергов давомида заҳарланишга "Shark Milk Product" корхонаси ишлаб чиқарган 3,2 фоиз ёғлиликдаги кефир сабаб бўлгани аниқланган. Мазкур маҳсулот аутсорсинг компаниялари орқали бир нечта давлат боғчаларига етказиб берилган.

 

Воқеадан сўнг Бош прокуратура махсус тергов гуруҳи тузиб, ишни алоҳида назоратга олган. Шунингдек, республика бўйлаб мактабгача таълим муассасаларига озиқ-овқат етказиб берувчи корхоналар фаолияти санитария талаблари ва маҳсулот сифати юзасидан қўшимча текширувдан ўтказилган.