Ўзбекистонда 5 778 та маҳаллада бирорта ҳам жиноят содир этилмади
Йил бошидан буён 5 мингдан ортиқ қидирувдаги шахс ушланиб, 2 633 нафар бедарак йўқолган шахс топилган.
2026 йилнинг дастлабки олти ойида Ўзбекистондаги 5 778 та маҳаллада бирорта ҳам жиноят содир этилмаган. Бу мамлакатдаги жами маҳаллаларнинг 64 фоизини ташкил этган. Шу билан бирга, жиноят қайд этилган маҳаллаларнинг 2 738 таси (30,4 фоиз) «сариқ», 476 таси (5,3 фоиз) эса «қизил» тоифага киритилган. Бу ҳақда Ички ишлар вазири ўринбосари Рамазон Ашропов маълум қилди.
Ҳисобот даврида Ички ишлар органларига 200 мингдан ортиқ мурожаат келиб тушган. Кўриб чиқилган мурожаатларнинг 87 фоизи бўйича фуқароларнинг талаб ва мурожаатлари қаноатлантирилган.
Шунингдек, олти ой давомида 2 633 нафар бедарак йўқолган шахс топилиб, оила аъзолари бағрига қайтарилди ҳамда турли нохуш ҳолатларнинг олди олинди.
Тезкор-қидирув тадбирлари натижасида тергов ва суд органларидан яширинган 5 010 нафар шахс қўлга олиниб, уларга нисбатан жазо муқаррарлиги таъминланган.
