Ўзбекистонда электр энергияси истеъмоли бўйича янги рекорд қайд этилди
Аномал иссиқ фонида республика бўйича суткалик электр энергияси истеъмоли ўтган йилги ёзги рекорддан юқори кўрсаткични қайд этди.
Ўзбекистонда 13 июль куни ёзги электр энергияси истеъмоли бўйича янги рекорд қайд этилди.
Энергетика вазирлиги маълум қилишича, жазирама ҳаво шароитида республика бўйича суткалик электр энергияси истеъмоли 278,6 миллион кВт/соатни ташкил этди. Бу ўтган ёзги мавсумдаги энг юқори кўрсаткичдан 6 миллион кВт/соатга ёки 2,2 фоизга кўп.
Аввалги ёзги рекорд 2025 йил 18 июль куни қайд этилган бўлиб, ўшанда суткалик истеъмол 272,6 миллион кВт/соатни ташкил этган эди.
Шунингдек, 13 июль куни мамлакатда 281,5 миллион кВт/соат электр энергияси ишлаб чиқарилди.
Вазирликнинг қайд этишича, ҳаво ҳароратининг янада ошиши фонида яқин кунларда электр энергияси истеъмоли ва тизим юкламаси бўйича янги рекордлар қайд этилиши мумкин.
Шу муносабат билан энергетика корхоналари кучайтирилган иш режимига ўтган. Ҳудудларда махсус авария-таъмирлаш бригадалари электр тармоқларида юзага келиши мумкин бўлган носозликларни тезкор бартараф этиш бўйича навбатчилик асосида фаолият юритмоқда.
Энергетика вазирлиги айрим ҳудудларда техник носозликлар сабаб электр таъминотида вақтинчалик узилишлар кузатилиши мумкинлигини билдириб, фуқароларни, айниқса энг юқори юклама соатларида, зарур бўлмаган электр жиҳозларини ўчириб, электр энергиясидан оқилона ва тежамкор фойдаланишга чақирди.
