Аномал иссиқда кўчатларни қачон суғориш керак?
Тўғри суғориш тартиби ўсимликларни иссиқ стрессидан ҳимоя қилиб, намликни узоқроқ сақлашга ёрдам беради.
Мутахассислар аномал иссиқ кунларда кўчат ва ўсимликларни кечки ҳамда тунги вақтда суғоришни тавсия қилмоқда.
Экология ва иқлим ўзгариши қўмитасининг қайд этишича, дарахт ва бута кўчатларини тўғри вақтда суғориш уларни иссиқ стрессидан ҳимоя қилади, тупроқдаги намликни сақлайди ҳамда соғлом ўсишини таъминлайди.
Энг мақбул суғориш вақти кечки соат 20:00 дан эрталаб соат 05:00 гача ҳисобланади. Бу даврда ҳаво салқин бўлгани сабабли сув камроқ буғланади ва илдизларга яхшироқ cингади.
Мутахассислар тавсиясига кўра:
-
Янги экилган кўчатлар соат 20:00–22:00 оралиғида камроқ, аммо тез-тез суғорилиши керак.
-
Ёш дарахтлар ҳафтасига 2–3 марта чуқур ва мўл суғорилади.
-
Катта дарахтлар эса ҳафтасига 1–2 марта, кечки ёки тунги вақтда чуқур суғорилиши тавсия этилади.
Шунингдек, сувни баргларга эмас, илдиз зонасига йўналтириш, уни секин қуйиш, тупроқ намлигини сақлаш учун мулчадан фойдаланиш тавсия этилади.
Мутахассислар соат 10:00 дан 17:00 гача кўчатларни суғормасликни тавсия қилмоқда. Чунки бу вақтда сув тез буғланиб, ўсимликларга зарар етказиши мумкин.
Эслатиб ўтилишича, ҳар бир ўсимлик ва тупроқ тури турлича намлик талаб қилади. Шу сабабли суғоришдан аввал тупроқ намлигини текшириш ва ўсимлик эҳтиёжидан келиб чиқиб иш тутиш мақсадга мувофиқ ҳисобланади.
