Бекободдаги металлург қиз Зулфия мукофоти билан тақдирланди
Mеталлургия комбинатига ташриф чоғида Дилноза Примқулова президентга бағишлаб ёзган шеърини ўқиб берганди.
Ўзбекистон металлургия комбинати акциядорлик жамиятининг Қуюв-прокатлаш мажмуаси мутахассиси Дилноза Примқулова Президент Шавкат Мирзиёев фармони билан Зулфия номидаги давлат мукофоти соҳибаси бўлди.
Эслатиб ўтамиз, давлат раҳбари 13 июль куни Бекобод шаҳридаги янги Қуюв-прокатлаш мажмуасининг очилиш маросимида иштирок этган эди. Тадбир давомида Дилноза Примқулова корхонадаги ёш мутахассислар фаолияти ҳақида сўзлаб, президент ташрифига бағишлаб ёзган шеърини ўқишга рухсат сўраган.
Шеърни тинглаган Президент Шавкат Мирзиёев унга истисно тариқасида Зулфия номидаги давлат мукофотини беришни таклиф қилган ва бу бўйича тегишли фармон имзоланишини маълум қилган эди.
14 июль куни мукофотни топшириш маросими бўлиб ўтди. Унда Сенат раиси Танзила Норбоева, Бош вазир ўринбосари – Оила ва хотин-қизлар қўмитаси раиси Дилноза Каттахонова, Тошкент вилояти ҳокими Зойир Мирзаев ҳамда кенг жамоатчилик вакиллари иштирок этди.
