Беларусдаги ҳибсхонада ўзбекистонлик аёл фарзандли бўлди
Аёлнинг илтимосига кўра, унинг янги туғилган фарзанди Ўзбекистондаги яқинлари қарамоғига топширилди.
Беларусдаги тергов ҳибсхонасида туғилган ўзбекистонлик чақалоқ Ўзбекистонга олиб келинди. Бу ҳақда Олий Мажлиснинг Инсон ҳуқуқлари бўйича вакили (Омбудсман) ахборот берди.
Маълум қилинишича, жорий йил 15 май куни Ўзбекистон делегацияси Омбудсман ташаббуси билан Беларуснинг Минск шаҳридаги тергов ҳибсхонасида сақланаётган Ўзбекистон фуқаролари билан учрашув ўтказган.
Учрашув давомида муассасада сақланаётган ҳомиладор Ўзбекистон фуқароси тергов ҳибсхонаси шароитида фарзандини тўлиқ парвариш қилиш имконияти чекланганини билдириб, чақалоқ туғилгач уни Ўзбекистондаги яқин қариндошлари қарамоғига топширишда амалий ёрдам сўраган.
Мазкур мурожаат назоратга олиниб, фарзанд дунёга келганидан сўнг Ўзбекистоннинг Беларус Республикасидаги дипломатик ваколатхонаси, тегишли давлат органлари ҳамда МДҲ Инсон ҳуқуқлари бўйича комиссияси ҳамкорлигида зарур ҳуқуқий ва консуллик тартиб-таомиллари амалга оширилган.
Натижада чақалоқни Ўзбекистонга қайтариш учун барча зарур ҳужжатлар расмийлаштирилди. Жорий йил июль ойида чақалоқ яқин қариндошлари қарамоғига топширилиб, Ўзбекистонга олиб келинди.
