Бухородаги кўп қаватли уйда юз берган ёнғин ичидан 3 киши қутқарилди
Ёнғиннинг қўшни хонадонларга тарқалиш хавфи сабаб 7 нафар қўшни фуқаро хавфсиз ҳудудга эвакуация қилинган.
Бухоро вилоятининг Когон шаҳрида жойлашган кўп қаватли уйлардан бирида юз берган ёнғин оқибатида 3 нафар фуқаро қутқарилди. Бу ҳақда Фавқулодда вазиятлар вазирлиги матбуот хизмати хабар берди.
Маълум қилинишича, 15 июль куни соат 03:38 да 112 ягона диспетчерлик хизматига Когон шаҳри Турон кўчасидаги кўп қаватли уй хонадонларидан бирида ёнғин содир бўлгани ҳақида хабар келиб тушган.
Воқеа жойига зудлик билан етиб борган ФВВ қутқарув бўлинмалари ёнғинни соат 03:46 да қуршаб олган ва соат 04:40 да тўлиқ бартараф этган.
Қутқарув ишлари давомида ёнғин содир бўлган хонадондан 3 нафар фуқаро соғ-саломат олиб чиқилган. Шунингдек, ёнғиннинг қўшни хонадонларга тарқалиш хавфи сабаб 7 нафар қўшни фуқаро хавфсиз ҳудудга эвакуация қилинган.
Ёнғин оқибатида хонадоннинг тахминан 50 квадрат метр майдонида пол қисми, деворлар ва айрим уй жиҳозлари зарарланган. Қутқарувчиларнинг тезкор ҳаракатлари натижасида 650 квадрат метрга яқин майдон ҳамда қўшни уй-жойлар ёнғиндан сақлаб қолинган.
Ҳодиса оқибатида тан жароҳати олганлар қайд этилмаган. Ҳозирда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
