Элликқалъада вояга етмаган шахс отасининг машинасида аварияга учраб, бошқа машинага 79 млн зарар етказди
Етказилган зарар унинг отасининг иш ҳақи ҳисобидан МИБ орқали жабрланувчига ундириб берилган.
Вояга етмаган Г.б. отасига тегишли “NEXIA” русумли автотранспорт воситасини Элликқалъа тумани, “Гулдурсин” ОФЙ ҳудудидаги “Қизилқалъа-Бустон-Гулдурсин-Тўрткўл” авто йўлида бошқариб келаётиб, ўзига қарама-қарши ҳаракатланиб келаётган “МALIBU” русумли автомашина билан тўқнашиб, юз берган автоҳалокат натижасида ушбу автомашинага 79 839 000 сўм моддий зарар етказган.
Етказилган зарарларни вояга етмаган Г.Б.нинг отаси В.Б.дан ундириш ҳақида Жиноят ишлари бўйича Элликқалъа туман суди томонидан ҳукм чиқарилган.
Ушбу ҳукмга асосан чиқарилган ижро варақа Мажбурий ижро бюроси Элликқалъа туман бўлими иш юритувига келиб тушган ва бўлим давлат ижрочилари томонидан ижро ҳаракатларига киришилган.
Хусусан, қарздорнинг четга чиқиш ҳуқуқи чекланиб, унинг номидаги автомашинага тақиқ ўрнатилган ҳамда қўшимчасига қарздорнинг иш ҳақига ундирув қаратилган.
Шунинг натижасида, етказилган 79 млн сўмдан ортиқ жиноий зарарлар тўлиғи билан ундирилиб, суд қарори ижроси таъминланган.
